سەردێر

دەستەی گەشتوگوزار: لەمساڵدا نزیكەی سێ‌ ملیۆن گەشتیار ڕوویان لە هەرێم كردووە

خەڵك-
سەرۆكی دەستەی گشتیی گەشتوگوزار ڕایدەگەیەنێت، لەمساڵدا نزیكەی سێ ملیۆن گەشتیار سەردانی هەرێمی كوردستانیان كردووە، ئەمەش بە ئاماژەیەكی باش دادەنێت كە دەبێتە مایەی دڵنیابوون لەوەی تا كۆتایی ساڵ ژمارەكە زۆر زیاتر دەبێت

بەپێی دیمانەیەكی فەرمانگەی میدیا و زانیاری حكومەتی هەرێمی كوردستان لەگەڵ، ئەمەل جەلال محەممەد سەرۆكی دەستەی گشتیی گەشتوگوزار:”لەگەڵ لایەنێكی پسپۆڕ و پەیوەندیدار ئەپڵیكەیشنێكی گەورەمان ئامادە كردووە بە ناو‌ی “سەنتەری زانیاریی گەشتوگوزاری كوردستان”، بۆ ئەوەی ببێتە ناوەندێكی بەرفرەوانی زانیارییەكانی تایبەت بە گەشتیاری لە هەرێمی كوردستان و گەشتیار لە هەر شوێنێكی دنیا سەردانی هەرێم بكات، بتوانێت لەم‌ ڕێگەیەوە زانیاری بەدەست بێنێت و شوێنەكان پێ بزانێت و ئەو پێداویستییانەی كە پێویستییەتی دەستی بكەوێت”.

بە وتەی سەرۆكی گشتیی دەستەی گەشتوگوزار:”لە كابینەی نۆیەم یەكێك لە سێكتەرە سەرەكییەكان سێكتەری گەشتوگوزار بووە، ئەمەش وای كردووە لە بەرنامەی كاری كابینەی نۆیەم زیاتر ڕەنگبداتەوە و جۆرێك لە بەرپرسیاریەتیش بەسەر دامەزاراوەكان دابەش بكات، لەو ڕوانگەیەوە ئێمە دەستەی گشتیی گەشتوگوزار بەرنامەیەكی جیاوازمان دەستنیشانكرد لەسەر ئەوەی ئایا دەتوانین بەو كەرەستەیە یاخود بەم شێوازە پێش بكەوین”.

سەبارەت بە ژمارەی هاتنی گەشتیار بۆ هەرێمی كوردستان، ئەمەل جەلال وتی:” ساڵی ڕابردوو كۆڕۆنا زیانی زۆری بە كەرتەكە گەیاند و خەریك بوو گەشتوگوزار بەرەو داڕمان ببات، لە ٢٠٢٠ دا ئێمە كەمترین داهات و كەمترین گەشتیارمان هەبووە، بەڵام لە ٢٠٢١ نزیكبووینەوە لە سێ ملیۆن گەشتیار، كە سەردانی هەرێمی كوردستانیان كردووە ئەمەش ئاماژەیەكی باشە كە ئێمە دڵنیاین تا كۆتایی ساڵ ژمارەكە زۆر زیاتر دەبێت.

سەرۆكی گشتیی دەستەی گەشتوگوزار”بۆ ٢٠٢٢ پلانمان ئەوەیە ژمارەی گەشتیار و پڕۆژە گەشتیارییەكان و خزمەتگوزاییەكانیش زۆر زیاتر بكەین، بە ئاسانكاری زیاتر بۆ هاتنی گەشتیاران لە بازگەكان و دەركردنی ڕێنمایی نوێ و پێدانی زانیاری زیاتر بە گرووپە گەشتارییەكان، دەمانەوێ تەواوی ناوچەكانی كوردستان بە گەشتیاران ئاشنا بكەین”.