سەردێر

دكتۆرای فەخری بە بێشكچی دەدرێت

خەڵك-

وەزیری خوێندنی باڵا زانكۆی دهۆكی ڕاسپارد ئامادەكاری بكات بۆ پێدانی دكتۆرای فەخری بە ئیسماعیل بێشكچی، كە نیو سەدەیە داكۆكی لە پرسی كورد دەكات.

وەزیری خوێندنی باڵا و توێژینەوەی زانستی ڕێز و پێزانین ئاراستەی كۆمەڵناس و نووسەری ناسراوی تورك ئیسماعیل بێشكچی دەكات، كە مـاوەی زیـاتـر لـە نیو سـەدەیـە لەڕێگـای نوسیـن و بەرهـەمە زانستیەكانی ژیـانی خۆی تەرخان كردوە بۆ داكۆكیكردن لە ڕاستی و پشتیوانیكردنی دۆزی ڕەوای گەلی كورد، هەروەها زانكۆی دهۆكیشی ڕادەسپێرێت ئامادەكاری بكات بۆ پێدانی دكتۆرای فەخری بە (ئیسماعیل بێشكچی).

بەپێی ڕاگەیەنراوێكی وەزارەتی خوێندنی بالای هەرێم، د. ئارام محمد قادر، وەزیری خوێندنی باڵا و توێژینەوەی زانستی بە ئامادەبونی بریكاری وەزارەت و سەرۆكی زانكۆی دهۆك و ڕاوێژكار و بەڕێوەبەرانی گشتی، پێشوازی لە كۆمەڵناس و نوسەری ناسراوی تورك ئیسماعیل بێشكچی و شاندی یاوەری كردووە و خەبات و تێكۆشانی ئیسماعیل بێشكچی لە داكۆكیكردن لە گەلی كوردستان و دۆزی ڕەوای كورد بەرز نرخاند.

وتیشی، “هەموو وشەیەكی نێو كار و بەرهەمە زانستییەكـان و قوربانییە مەزنەكانی بێشكچی بەرز دەنرخێنین، بە چـاوی ئەمەك و پێزانینەوە لێیان دەڕوانین، هیوای تەمەنی درێژ و تەندروستی باشی بۆ دەخوازین”.

لە پێناو بەرزنرخاندنی هەوڵ و ماندوبون و شەونخونیەكانی بۆ داكۆكی كردن لە دۆزی ڕەوای گەلی كوردستان، د. ئارام محمد قادر، سەرۆكی زانكۆی دهۆكی ڕاسپارد ئامادەكاری پێویست ئەنجام بدەن، بۆ پێدانی دكتۆرای فەخری بە كۆمەڵناس و نوسەری ناودار ئیسماعیل بێشكچی.

ڕاشیگەیاند، سێنتەری بێشكچی لە زانكۆی دهۆك بۆ لێكۆڵینەوەی مرۆڤایەتی لە ڕێگەی توێژینەوە و بابەتە زانستی و ئەكادیمییەكانی كاری بۆ پێشخستنی ئاستی زانكۆ و بیر و بۆچوون و گەیاندنی پەیامە ڕاستەقینەكان كردوە. بۆیە پەرەپێدانی سێنتەری بێشكچی و كاركردن لەسەر هەڵوێستە نیشتیمانیەكانی لەپێناو دۆزی كورد ئەركی سەرەكیمانە.

May be an image of one or more people and people standingMay be an image of one or more people, people sitting and indoor