سەردێر

قوباد تاڵەبانی ڕاگەیەنراوێكی بڵاوكردەوە

خەڵك-
جێگری سەرۆك وەزیرانی هەرێمی كوردستان بەبۆنەی 32 ساڵەی دامەزرانی یەكێتی ژنانی كوردستانەوە ڕایدەگەیەنێت، هێشتا پێشێلكاری بەرامبەر بە مافە بنەڕەتییەكانی ژنان بەردەوامە.

قوباد تاڵەبانی لە ڕاگەیەنراوێكدا ئاماژەی بەوەكردووە، ئەركی ئێوە وەك یەكێتی ژنانی كوردستان لەم قۆناغەدا لە هەمووكات قورستترە و پێویستە لەگەڵ ڕێكخراوەكانی كۆمەڵگەی مەدەنی و چالاكوانانی دیكەی ژنان هەوڵەكانتان چڕتر بكەنەوە و هەماهەنگی زیاتر لەنێوان خۆتاندا دروست بكەن، بۆ كۆتاییهێنان بە هەرجۆرە پێشێلكارییەك بەرامبەر بە ژنان و ئێمەش لەم ڕووەوە بە تەواوی پشتیوان و هاوكارتان دەبین.

دەقی ڕاگەیەنراوەكە:

بەڕێزان ئەندامانی یەكێتی ژنانی كوردستان
٣٢ ساڵ لەمەوبەر لە هەناوی شۆڕشی نوێی گەلەكەماندا و لە شاری سەقزی رۆژهەڵاتی كوردستان كۆمەڵێك لە ژنانی ئازا و روناكبیر و خەباتكاری ناو ریزەكانی یەكێتیی نیشتمانیی كوردستان، هەنگاوێكی گەورەیان نا و یەكێتی ژنانی كوردستانیان دامەزراند.
یەكێتی ژنان لەماوەی سێ دەیەی رابردوودا ڕۆڵی گرنگی بینیوە لە وشیاركردنەوەی ژنانی كوردستان بەرامبەر بە مافەكانیان و پێشەنگ بووە لە رێكخستنی تواناكانی ژنان لەپێناو بەدیهێنانی یەكسانی جێندەری لە كوردستان و لەم سۆنگەیەشەوە رێز و پێزانینی تەواومان هەیە بۆ هەوڵ و ماندووبوونی یەك بە یەكی ئەندامانی یەكێتی ژنان.
لە ئێستادا كە یادی ٣٢ ساڵەی دامەزراندنی ڕێكخراوەكەتان دەكەینەوە، وێڕای ئەوەی پیرۆزبایی ئەم یادەتان لێ دەكەین، هیوادارین بە خۆڕێكخستنەوەتان و گوڕوتین بەخشین بە هەوڵ و چالاكییەكانتان بتوانن لە ئاستی ئەم قۆناغە نوێیەی گۆڕانكارییە كۆمەڵایەتییەكان بن لە كۆمەڵگەی كوردستاندا.
سەرباری هەوڵ و خەباتی یەكێتی ژنان و هەموو چالاكوانانی بواری مافەكانی ژنان بۆ بەدیهێنانی یەكسانی جێندەری، بەداخەوە هێشتا پێشێلكاری بەرامبەر بە مافە بنەڕەتییەكانی ژنان بەردەوامە و رۆژانە گوێبیستی هەواڵی پێشێلكارییەكان دەبین. هەربۆیە ئەركی ئێوە وەك یەكێتی ژنانی كوردستان لەم قۆناغەدا لە هەمووكات قورستترە و پێویستە لەگەڵ ڕێكخراوەكانی كۆمەڵگەی مەدەنی و چالاكوانانی دیكەی ژنان هەوڵەكانتان چڕتر بكەنەوە و هەماهەنگی زیاتر لەنێوان خۆتاندا دروست بكەن، بۆ كۆتاییهێنان بە هەرجۆرە پێشێلكارییەك بەرامبەر بە ژنان و ئێمەش لەم ڕووەوە بە تەواوی پشتیوان و هاوكارتان دەبین.
جارێكیتر یادی ٣٢ ساڵەی دامەزراندنی یەكێتی ژنانی كوردستان لە دەستەی دامەزرێنەران و ئەندامانی سكرتاریەت و سەرجەم ئەندامانی رێكخراوەكەتان پیرۆز دەكەین و هیوای سەركەوتنی زیاترتان بۆ دەخوازین.