سەردێر

دەنگی زیاتر لە 20 وێستگە بەدەست ئەژمار دەكرێنەوە

هەولێر و سلێمانی تێدایە

خەڵك-
كۆمسیۆنی باڵای سەربەخۆی هەڵبژاردنەكان ڕایدەگەیەنێت 108 تانە خراوەتە بەردەم كۆمسیۆن و تەنیا 22 تانەیان مەرجەكانی پێشكەشكردنی سكاڵای تێدابووە كە پەیوەندییان بەپارێزگاكانی هەرێم ‌و ناوەڕاست ‌و باشوورەوە هەیە، بۆ ئەو مەبەستەش دەست بەلێكۆڵینەوه كراوە.

بەپێی ڕاگەیەندراوێك كە لەلایەن كۆمسیۆنی باڵای سەربەخۆی هەڵبژاردنەكانی عێراق بڵاوكرایەوە”ئەنجومەنی كۆمسیاران ڕەزامەندی لەسەر دوبارە ژماردن‌و جیاكردنەوەی دەستی دەنگەكان داوە لەوێستگەكانی ھەڵبژاردنی تانە لەسەردراو لەسەر بنەمای (22) تانەو دابەشبوون بەسەر پارێزگاكانی، (واست، سلێمانی، نەجەف، ھەولێر، نەینەوا، كەركوك، زیقار، ئەنبار، قادسیە، سەڵاحەدین، بەسرە، بەغداو بابل) بەھۆی بونی بەڵگەو كۆمسیۆنیش ھەڵدەستێت بەپێشكەشكردنی ڕاسپاردەی گونجاو لەبارەیەوە دوای تەواوكردنی ڕێككارەكانی ژماردن‌و جیاكردنەوەی دەستیی”.

هەر لە ڕاگەیەندراوەكەدا هاتووە””ئەوە دروست نییە كە لەھەندێك لەھۆیەكانی ڕاگەیاندن‌و سۆشیال میدیا باسكراوە لەبارەی ئەنجامی تانەكان، بەڵكو لەلایەن كۆمسیۆنەوە دوای بەكۆتاھاتنی پرۆسەی ژماردن‌و جیاكردنەوەی دەنگەكان دەرەنجامی تانەكان لەبەغدا ڕادەگەیەنرێت”.

كۆمسیۆن دەڵێت”دەستدەكەن بەڕێكاری ژماردن‌ و جیاكردنەوەی دەستی دەنگەكان بۆ وێستگە تانە لەسەر دراوەكانی سەر بەئۆفیسی پارێزگای نەینەوا لەڕۆژی 27ی تشرینی یەكەم لەكاتژمێر هەشتی بەیانی تاكاتژمێر پێنجی پاشنیوەڕۆ، بەدواشیدا پرۆسەكە بەردەوامدەبێت بۆ سەرجەم پارێزگاكانی دیكە بەپێی خشتەیەكی كاتی كە دواتر ناوو ژمارەی ناوەندو وێستگە تانە لەسەر دراوەكانی تێدا دیاریدەكرێت لەسەر ئاستی پارێزگاو بازنەی ھەڵبژاردن، پرۆسەكەش بەئامادەبونی نوێنەری پاڵێوراوەكانی ئەو بازنەو وێستگانەی تانەیان لەسەرەو لەگەڵ چاودێرەكان‌و ھۆیەكانی ڕاگەیاندن‌و كۆمسیۆن بەردەوامە لەڕوانین بۆ ئەو تانانەی دیكە كە پێشكەشكراون”.