سەردێر

ڤیزە لەنێوان عیراق و ئێراندا نەما

خەڵك-
باڵیۆزی ئێران لە عیراق ڕایدەگەیەنێت، هاووڵاتیانی ئێرانی دەتوانن بەبێ‌ ڤیزا لەڕێی ئاسمانەوە سەفەر بكەن بۆ عیراق.

ئەمڕۆ دوو شەممە، ئیرەج مەسجدی، باڵیۆزی ئێران لە بەغدا لە تویتێكیدا لەسەر تۆڕی كۆمەڵایەتی تویتەر ڕایگەیاند”لەمیانی پیرۆزباییمان بەبۆنەی جەژنی لەدایكبوونی پێغەمبەر درودی خوای لێبێت، دەمەوێت ئەوە بە ڕۆڵەكانی نیشتمانەكەم بڵێم كە لەمڕۆوە دەتوانن بە فڕۆكە و بەبێ‌ ڤێزە و بە پاسپۆرت و بەڕەچاوكردنی پرۆتۆكۆڵی تەندروستی، سەفەر بكەن بۆ عیراق”.

هەر ئەمڕۆ دوو شەممە، فڕۆكەخانەی نەجەف ڕایگەیاند كە ڕێگە بە هاووڵاتیان دەدرێت بەبێ‌ ڤیزەی چوونە ناوەوە، سەفەر بكەن بۆ ئێران.

ڕاگەیاندنی فڕۆكەخانەی نەجەف لە بەیاننامەیەكی كورتدا بڵاويكردەوە”فڕۆكەخانەی نەجەف لەمڕۆ دوو شەممە 25ی تشرینی یەكەمی 2021، دەستیكردووە بە قبوڵكردنی ئەو گەشتیارانەی دەیانەوێت بەرەو كۆماری ئیسلامی بەڕێبكەون بەبێ‌ ڤیزە”.