سەردێر

بەنزینە هەرزانەکەی حکومەتى عێراق لەسلێمانی دەست بەدابەشکردنی کرا

 

سلێمانی – نزار جەزا

ئەمڕۆ دوو شەممە نیوەی بەشە بەنزینی پارێزگای سلێمانی لە ٤ تەنکەردا گەیشتە شاری سالێمانی و کەمێک پێش ئێستا دەستیان بەدابەشکردنی بەنزینەکە کرد.

 

پاش ئەوەی حکومەتى هەرێم ڕایگەیاند، بڕی ٤٥٠ هەزار لیتر بەنزین دابەشی پارێزگاکانی هەرێم دەکەن، ئەمڕۆ ٤ تەنکەر بەنزین گەیشتە پارێزگای سلێمانی و دابەشی سەر بەنزینخانەکان کرا.

 

بەپێی زانیارییەکانی (خەڵک) ١٠ بەنزینخانە لەپارێزگای سلێمانی تەرخانکراوە بۆ ئەو بەنزینەی حکومەتى عێراق دەیفرۆشێتە حکومەتى هەرێم و ئەویش دەیفرۆشێتەوە بە بەنزینخانەکان، بەڵام ئەمڕۆ تەنها پێنج تەنکەر دانرابوو بۆ سلێمانی، یەکێک لەتەنکەرەکانیش بەهۆی کێشەیەکەوە دواکەوتووە، واتە تەنها ٤ تەنکەر بەنزین گەیشتووەتە سلێمانی.

 

حکومەتی عێراق ئەو بەنزینە لەپاڵاوتگەی کار دەکڕێت، هەر لەوێشەوە راستەوخۆ حکومەتى عێراق بە ٦٥٠ دینار بەحکومەتى هەرێمی دەفرۆشێتەوە، حکومەتى هەرێمیش بە ٢٠ دینار خێر دەیفرۆشێتە بەنزینخانەکان، بەنزینخانەکانیش بە٢٠ دینار خێری دیکە دەیفرۆشنەوە بە هاوڵاتییان، واتە بە ٦٩٠ دینار دەگاتە دەستی هاوڵاتی.

 

بەپێی زانیارییەکان، 144 هەزار لیتر بەنزین گەیشتووەتە سلێمانی و بەچوار تەنکەر دابەشکراوە بەسەر بەنزینخانەکانی (وێستگەی بامۆک، وێستگەی بەختیار، وێستگەی حەوایی، وێستگەی قەیوانی ۱).

 

هەر بەپێی زانیارییەکان، سبەینێ سێ شەممە بڕیارە بەنزین بەشی بەنزینخانەکانی (وێستگەی برایەتی، وێستگەی مژدە، وێستگەی های ماونت HM، وێستگەی هەڵەبجە گرووپ، وێستگەی ئازادی، وێستگەی سلێمانی نوێ) بگات.

 

هەر بەپێی ئەو زانیارییانە، واتە لەسلێمانی ١٠ بەنزینخانە بۆ ئەو بەنزینە تەرخانکراوە، ئەوانیش ڕۆژە نا ڕۆژێک وەریدەگرن.

 

خاوەن بەنزینخانەیەک وتی: ئەو بەنزینەی کە وەریدەگرن بەشی چەند کاتژمێرێک دەکات، چونکە هاوڵاتییان دێن سەرەی بۆ دەگرن و زوو تەواودەبێت.

 

بەهمەن شێخ قادر، وتەبێژی بەنزینخانەکانی سلێمانی بۆ (خەڵک)ی ڕوونکردەوە، بەشە بەنزینی ناو شاری سلێمانی سلێمانی ٣٦٠ هەزار لیتر بەنزین بوو، بەڵام ئەو بڕەی کە نێردراوە نیوەی کەمتریشە، بۆیە هیوادارن بڕەکەی لەچەند ڕۆژی ئایندەدا زیادبکرێت.

 

ئاماژەى بەئەوەشکرد، نرخی ئەم بەنزینە نۆڕماڵە لەئێستادا بە ٦٩٠ دینار دیاریکراوە، ئەم نرخەش لەئێستادا جێگیرە، ئەگەر لەداهاتوودا بڕەکەی زیادکرا و نرخەکەی گۆرانی تێداکرا، ئەوکاتە بەفەرمی ڕادەگەیەنرێت، بەڵام لەئێستادا ئەو نرخە جێگیرکراوە.

 

ئەمە لەکاتێکدایە حکومەتى هەرێم لەڕێکەوتى (٢٠٢١/١٠/٢٤) بڕیاریدا بڕی (٥٤٠) هەزار لیتر بەنزین بگاتە وێستگەکانی هەر چوار پارێزگای هەرێمی کوردستان و لە دوو ڕۆژی ئایندەشدا ئەو بڕە بۆ دوو بەرامبەر زیاد دەکرێت. ئەگەر ئەم بڕیارە وەک خۆی جێبەجێبکریت، ئەو ١٠ بەنزینخانەیە هەموو ڕۆژێک بەشە بەنزینی خۆیان وەردەگرن.