سەردێر

پەڕلەمانی كوردستان خۆی لە كێشەكانی هاووڵاتیان بێدەنگ دەكات

خەڵك-
چەندین قەیران بەرۆكی هاووڵاتیانی هەرێمی كوردستان گرتووە و گرانی سەراپای سووتەمەنی و خواردن و جلوبەرگ و پێداویستییەكانی ڕۆژانەی گرتۆتەوە و خۆپیشاندان و بایكۆتی مامۆستایانی وانەبێژ 3 هەفتەی تێپەڕاند، بەڵام پەڕلەمانی كوردستان بێ‌ خەمە و هیچ هەڵوێستێكی نییە و ماوەی مانگ و نیوێكە كۆبوونەوەی ئاسایی خۆشی نەكردووە.

سەرچنار ئەحمەد، ئەندامی پەڕلەمانی كوردستان بۆ (خەڵك) ئاماژەی بەوەكرد، ئێمە بە یاداشتی واژۆكراوی ژمارەی یاسایی پەڕلەمانتاران داوای دانیشتنی تایبەتی پەڕلەمانمان كردبوو لەسەر پرسی سێ یەكەمەكان و وانەبێژان و فەرمانبەرانی گرێبەست، نەك خوێندنەوەی ڕاپۆرتی بەدواداچوونی لیژنە، هەروەها ئێمە داوای دانیشتنی تایبەتمان كردبوو لەسەر پرسی گرانبوونی سوتەمەنی و بەنزین نەك خوێندنەوەی ڕاپۆرتی بەدواداچوونی لیژنە”.

بڕیارە 26ی ئەم مانگە پەڕلەمانی كوردستان دوای مانگ و نیوێك لە ڕاگرتنی كۆبوونەوەكانی، كۆبوونەوە دەستپێبكاتەوە و خوێندنەوە بۆ ڕاپۆرتی لیژنەكانی بەدواداچوون لەسەر پرسی سێ‌ یەكەمەكان و وانەبێژان و سووتەمەنی دەكات، لەكاتێكدا پێشتر پەڕلەمانتاران بە یاداشتی فەرمی داوای كۆبوونەوەیان كردبوو لەسەر ئەو پرسانە و هێنانە بەردەم پەڕلەمانی وەزیرە پەیوەندیدارەكان.

سەرچنار ئەحمەد وتیشی، “ئەم كارانەی سەرۆكایەتی پەرلەمان دەیكات جگە لەخۆدزینەوە لەبەرپرسیارێتی هیچی ترنییە”.

ڕاشیگەیاند، ئێمە سورین لەسەر یاداشتەكانی خۆمان، كە واژۆی پێویستمان بۆ كۆكردۆتەوە و داوای دانیشتنی تایبەتی پەڕلەمان دەكەین لەسەر چارەسەری پرسەكانی سێ یەكەمەكان و وانەبێژان و فەرمانبەرانی گرێبەست و هەروەها چارەسەری گرفتی كەمی و گرانبوونی سوتەمەنی و بەنزین بەئامادەبوونی وەزیرە پەیوەندیدارەكان لەحكومەتی هەرێمی كوردستان.