سەردێر

گەورەترین كوتلەی پەڕلەمانی بۆ پێكهێنانی حكومەتی عێراق ڕاگەیەنرا

خەڵك-
ڕێبەری ڕەوتی سەدر ئاشكرای دەكات، كە بەپێی ئەنجامی هەڵبژاردنەكان، كە كۆمسیۆن ڕاگەیاندووە بوونەتە یەكەم كوتلەی بەهێزی پەڕلەمانی بۆ پێكهێنانی حكومەتی نوێی عێراق.

موقتەدا سەدر، ڕێبەری ڕەوتی سەدر لە بەیاننامەیەكدا ڕایگەیاندووە، لیستەكەیان لە هەڵبژاردنی پێشوەختەی پەڕلەمانی عێراق بە ناوی (هاوپەیمانی سائیرون) بووە بە گەورەترین كوتلەی پەڕلەمانی بە بەدەستهێنانی (73) كورسی لەكۆی (329) كورسی پەڕلەمان و بەوەش هەوڵی پێكهێنانی هاوپەیمانێتیدان لەگەڵ لیستەكانی دیكە.

جەختیشی كردۆتەوە، بڕیارەكانی كۆمسیۆنمان قبوڵە، بە دڵنیاییەوە یەكەم كارمان ڕەزامەندی خودا و دووەمیش كەمتەرخەمی ناكەین بەرانبەر گەلەكەمان، چونكە گەل بەرانبەرمان لەم پڕۆسە دیموكراسیەدا كەمتەرخەم نەبووە.

موقتەدا سەدر دەڵێت: “سائیرون هەوڵی فراوانكردنی هاوپەیمانێتییەكی نیشتیمانی دەدات دوور لە دەمارگیری و نەتەوەچێتی، بەڵكو لەژێر چەتری چاكسازی و پێكهێنانی حكومەتێكی خزمەتگوزار و پاراستنی ئاسایش و سەروەری عێراق”.

بەپێی بڕیارێكی دادگای فیدڕاڵی بۆ لێكدانەوەی دەقەكانی دەستوور و یاسای هەڵبژاردنەكان، گەورەترین كوتلەی ناو پەڕلەمان دەتوانێت لەماوەیەكی دیاریكراودا لەدوای پەسەند كردنی ئەنجامی هەڵبژاردن لەلایەن دادگای فیدڕاڵییەوە كاندیدی خۆی ڕابسپێرێت بۆ پێكهێنانی حكومەت.

لە پێش هەڵبژاردنەكانی پەڕلەمانی عێراق، ڕەوتی سەدر لە بەیاننامەیەكدا ئاشكرای كردبوو، كە چەند كاندیدیان هەیە بۆ پۆستی سەرۆك وەزیرانی داهاتوو ئەگەر زۆرینەی پەڕلەمان مسۆگەر بكەن، كە بەهێزترینیان مستەفا كازمی و جەعفەر سەدر و حەسەن كەعبی.