سەردێر

بلاسخارت گەیشتە لای كازمی و هەڵوێستی ڕاگەیاند

خەڵك-
نێردەی تایبەتی سكرتێری گشتی نەتەوە یەكگرتووەكان دەچێتە لای كازمی و پرسی هەڵبژاردنەكان تاوتوێ‌ دەكەن و دەڵێت: “پاڵپشتی ڕێوشوێنەكانی كۆمسیۆن دەكەین بۆ دەرچووونی ئەنجامەكان”.

بەپێی ڕاگەیەنراوێكی نووسینگەی سەرۆك وەزیرانی عێراق، مستەفا كازمی و جینین بلاسخارت، نێردەی تایبەتی سكرتێری گشتی نەتەوە یەكگرتووەكان كۆبوونەوە و تاوتوێی پڕۆسەی هەڵبژاردنیان كرد و بۆ تەواو كردنی لە هەموو ڕووەكانەوە.

بەپێی ڕاگەیەنراوەكە، كازمی ستایشی بەشداری و هاوكاری ڕێكخراوە نێودەوڵەتی و چاودێرە نێودەوڵەتییەكانی كردووە بۆ بەڕێوەچوونی هەڵبژاردنەكانی عێراق و لای خۆشیەوە، بلاسخارت پیرۆزبایی لە كازمی كردووە بەبۆنەی سەركەوتنی هەڵبژاردنەوە، هەروەها ستایشی پلانی لۆجیستی و ئەمنی حكومەتی كردووە لەو بارەیەوە.

ئاماژەی بەوەشكردووە، نەتەوە یەكگرتووەكان لایەنێكی پاڵپشتیكەر دەبێت بۆ ڕێوشوێنەكانی كۆمسیۆن لەپێناو دەرچوونی ئەنجامی هەڵبژاردن، كە ڕەنگدانەوەی ئیرادەی دەنگدەران بێت.