سەردێر

نرخی نەوتی سپی لە بازاڕەكانی هەرێم گران بوو

خەڵك-
وەرزی سەرما دەستی پێكرد و هێشتا هاووڵاتیان لە چاوەڕوانی بەڵێنی حكومەتی هەرێمدان بۆ پێدانی بەرمیلێك نەوت و ڕۆژ بەڕۆژیش نرخی نەوتی سپی لە بازاڕەكانی هەرێم ڕوو لە گران بوون دەكات.

ئەنجوومەنی وەزیرانی هەرێمی كوردستان لە كۆبوونەوەی ڕۆژی چوار شەممە 28-7-2021 بۆ دووەم جار بڕیاریدا “بۆ وەرزی زستان نەوت بۆ هاووڵاتیان دابین بكات” لەكاتێكدا لە كۆبوونەوەی 4-9-2019شدا ئەنجوومەنی وەزیرانی هەرێم هەمان بڕیاریدابوو، بەڵام نەوت دابەش نەكرا، جگە لەو بڕە كەمەی لە بەغداوە بۆ هاووڵاتیانی هەرێم ڕەوانەكرا.

لە بەدواداچوونێكی مەیدانی (خەڵك) هاووڵاتیان ڕایانگەیاند، كە بەهۆی بڕیارەكەی حكومەتی هەرێمەوە نەوت-یان نەكڕیوە و چاوەڕێ‌ بوون نەوتی حكومەت بە هەرزان وەربگرن، بەڵام تا ئێستا نەوتیان پێ‌ نەدراوە و ڕۆژ بەڕۆژیش نرخەكەی لە بازاڕدا ڕوو لە بەرزبوونەوەیە.

ڕزگار عەبدوڵڵا، كە كاری فرۆشتنی نەوت و بەنزین دەكات بۆ (خەڵك) ئاماژەی بەوەكرد، ڕۆژ بەڕۆژ نرخی نەوت لە بازاڕدا ڕوو لە بەرزبوونەوە دەكات و ئەمڕۆ نرخی یەك بەرمیل گەیشتۆتە 165 هەزار دینار.

ئەو فرۆشیارەی نەوت هۆكارەكانی گرانبوونی نەوت بۆ 3 خاڵ دەگەڕێنێتەوە و دەڵێت: “نرخی نەوت لە بازاڕی جیهانی بەرزبۆتەوە بۆ سەرووی 80 دۆلار و هەروەها بەهۆی هاتنی سەرماوە خواست لەسەر نەوت زیادی كردووە و لەبەرامبەردا بڕی نەوتی سپی لە بازاڕدا كەمە و هاوكات حكومەتیش تا ئێستا هیچ بڕیارێكی نەداوە بۆ پاڵپشتی سووتەمەنی و پێدانی بە نرخی هەرزان بە هاووڵاتیان”.

قەیرانەكانی سەر شانی هاووڵاتیان ڕۆژ بەڕۆژ زیاد دەكەن و لە ئێستادا سەرباری گرانی نرخی شتومەك و زیادبوونی باج و ڕسوماتەكان، نرخی سووتەمەنی (بەتایبەت بەنزین و نەوتی سپی) بەرزبۆتەوە و حكومەتیش سەرەڕای چەندین بڕیار و بەڵێن تا ئێستا دەستوەردانی نەكردووە لە كۆنتڕۆڵ كردنی گرانی و دابەزاندنی نرخەكەی.

ئەمە لەكاتێكدایە، كە ئەمڕۆ جارێكی دیكە نرخی بەنزین ڕووی لە بەرزبوونەوە كردووە و بۆ هەر لیترێك 25 دیناری چۆتە سەر و خاوەنی بەنزینخانەیەك بۆ (خەڵك) ئاشكرای كرد، كە ئەگەر حكومەت چارەسەری دۆخەكە نەكات زیاتر گران دەبێت.

سەرباز عەلی بەگ، خاوەنی بەنزینخانەی خالید بە(خەڵك)ی ڕاگەیاند، لەم چەند ڕۆژەی داهاتوودا نرخەكان بەرزتردەبنەوە و 25 دینار یان 50 دیناری دیكەی دەچێتەسەر، بۆ داهاتووش گەر چارەسەر نەكرێت بەرزتریش دەبێتەوە.

باسی لەئەوەشكرد، هۆكاری ئەم بەرزبوونەوەیە دەگەڕێتەوە بۆ كەمی بەنزین و گرانبوونی نەوتی ڕەش لەجیهاندا.

زیاتر ڕوونیكردەوە، بەنزینی هەرێم بازرگانییە و لەئێرانەوە دێت، كاتێك لەجیهاندا نرخی نەوتی ڕەش بەرزدەبێتەوە كاریگەری لەسەر بەنزینەكەش دەبێت.

جەختیشی كردەوە، ئەگەر پاڵاوتگەی كار و بازیان بەنزین بۆ هەرێمی كوردستان بەرهەمبهێنن، بەم جۆرە نرخ بەرزنابێتەوە.