سەردێر

یەكێتی كورسییەكی دیكەی پەڕلەمانی بەدەستهێنا

خەڵك-
لە سنووری پارێزگای نەینەوا سێ كاندیدی هاوپەیمانی كوردستان- یەكێتی بۆ پەڕلەمانی عیراق سەركەوتن بەدەست دەهێنن دوای ئەوەی كۆمسیۆن بڕیاریدا لەسەر سكاڵای یەكێتی دەنگەكانی سنووری بازنەی چواری ئەو پارێزگایە ببرێنەوە بەغدا و بەدەست ببژێردرێنەوە.

دوێنێ‌ 11ی تشرینی یەكەم، لەدوای 24 كاتژمێر لە بەڕێوەچوونی هەڵبژاردنی پەڕلەمانی عێراق، ئەنجامی بەرایی هەڵبژاردنەكان ڕاگەیەنرا لەلایەن كۆمسیۆنی باڵای سەربەخۆی هەڵبژاردنەكانەوە و یەكێتی لە نەینەوا 2 كورسی بەدەستهێنابوو، بەڵام دوای تانەی ئەو حزبە لە كۆمسیۆن كورسییەكی دیكەی بۆ زیادبوو، بەوەش ژمارەی كورسییەكانی دەبێتە 18 كورسی.

غەیاس سورچی، كارگێڕی مەڵبەندی نەینەوای یەكێتیی بۆ (خەڵك) ڕایگەیاند، لە سنووری بازنەكانی پارێزگای نەینەوا سێ كاندیدی هاوپەیمانیی كوردستان، كە هەرسێكیان ژنن و یەكێتین سەركەوتنیان بەدەستهێناوە.

وتیشی، “لە بازنەی یەك-ی نەینەوا ئەحلام ڕەمەزان فەتاح كاكەیی بە 4910 دەنگ سەركەوتووە، هەروەها لە بازنەی دووی نەینەوا ڕۆنزا زیاد سەیدو بەگ بە 5840 دەنگ سەركەوتنی بەدەستهێناوە و لە بازنەی چواری نەینەوا عەزیزە عەبدولعەزیز كامل بریڤكانی زیاتر لە 3900 دەنگی بەدەستهێناوە، بەڵام بەهۆی كێشەی تەكنیكییەوە لە كۆمسیۆنەوە ژنێكی دیكە لە بەرەی توركمانی بە سەركەوتوو دانرابوو، كە 3300 دەنگی هێناوە و ئەوەش جێگەی سەرسوڕمانی ئێمەبوو”.

ئاشكراشی كرد، كۆمسیۆنی نەینەوا پێی ڕاگەیاندووین، كە هەڵەی تەكنیكی لە ژماردنی دەنگەكان هەبووە و ئێمەش بەپێی شریتەكانی ڕۆژی دەنگدان، كە خودی كۆمسیۆن پێی داوین سكاڵامان تۆماركردووە و كۆمسیۆنی بەغداشمان ئاگادجار كردووە و بڕیاریانداوە سەرجەم دەنگەكانی ئەو بازنەیە ببرێنە بەغدا و بەدەست ببژێردرێنەوە و لە 48 كاتژمێردا ئەنجامەكەی ڕابگەیەنن.

جەختیشی كردەوە، بەهۆی ئەوەی كاندیدەكەی ئێمە 600 دەنگ لەپێشترە، بۆیە بەدڵنیاییەوە ئەو كورسییەش مسۆگەر دەكەین و كۆمسیۆن دڵنیایی پێداوین.

ئەمە لەكاتێكدایە، كە ئەمڕۆ فەیسەڵ كەریم خانی برادۆست لە سنووری بازنەی سۆرانی پارێزگای هەولێر، كە كاندیدی یەكێتی-یە ڕایگەیاندووە، دەنگی پێویستی بەدەستهێناوە بۆ بوون بە پەڕلەمانتار و دەستكاری ئەنجامەكان كراوە و لە كۆمسیۆن سكاڵا تۆمار دەكەن و بەڵگەكان ڕادەستی دەكەن.