سەردێر

كۆمسیۆن باس لە ساختەكاریی لە هەڵبژاردنەكەی ئەمڕۆدا دەكات

خەڵك-
كۆمسیۆنی باڵای سەربەخۆی هەڵبژاردن لە عیراق، ڕەتیدەكاتەوە هیچ ساختەكارییەك لە پرۆسەی هەڵبژاردندا كرابێت و ئاماژە بەو كێشانەش دەكات كە لە پرۆسەی دەنگداند ڕویاندا كە بەهۆی “هەستیاریی ئامێرەكانەوە بوون”.

جومانە غەللای، وتەبێژی كۆمسیۆن لە لێدوانێكی ڕۆژنامەوانیدا ڕایگەیاند”ئەو كێشانەی لە پرۆسەی دەنگداندا ڕویاندا، تایبەت بوون بە لەگەڕكەوتنی ئامێرەكان و هۆكارەكەی هەستیاریی ئەو ئامێرانەن كە لە پرۆسەی هەڵبژارندا بەكارهێنران”.

بە وتەی غەللای”هەندێك لە كارمەندان لەگەڵ دەرنەكەوتنی پەنجە مۆری دەنگدەر، ئامێرەكانیان دەكوژاندنەوە و سەرلەنوێ‌ هەڵیاندەكردەوە، ئەمەش پێویستی دەكرد پاسۆردێكی نوێ‌ بۆ ئامێرەكە دابنرێت، تیمە گەڕۆكەكانیش لە دواتردا توانییان ئەو كێشانە چارەسەر بكەن كە لە هەندێك لە وێستگەدا ڕویاندا”.

غەللای هاووڵاتیانی دڵنیاكردەوە لەڕوونەدانی ساختەكاریی و وتی”مافی دەنگدەر پارێزراوە”.

ئەمڕۆ یەك شەممە، بۆ پرۆسەی دەنگدانی گشتی، وێستگەكانی دەنگدان لە كاتژمێر 7ی بەیانییەوە كرانەوە و دەستكردن بە هەڵبژاردنی پێشوەختە ڕاگەیەندرا و تێیدا نزیكەی 25 ملیۆن عیراقی مافی دەنگدانیان هەبوو لە هەڵبژاردنەكەدا.

پرۆسەی دەنگدان تا كاتژمێر شەشی ئێوارە بەردەوام بوو و دوای ئەوەش وێستگەكان داخران، بڕیاریشە ئەنجامەكانی هەڵبژاردن لەدوای 24 كاتژمێر ڕابگەیەنرێن.
زیاتر لە 3 هەزار كاندید لە هەڵبژاردنی عیراق، بۆ دەستەبەركردنی 329 كورسی پەرلەمان كێبڕكێ‌ دەكەن.