سەردێر

سەرپێچییەكانی دەنگدانی تایبەت ئاشكراكران

خەڵك-

تۆڕی باڵیۆزانی ئازادی ڕایدەگەیەنێت، بەهۆی لەكاركەوتنی هەندێك لە ئامێرەكان و كەم شارەزایی هەندێك لە كارمەندانی كۆمسیۆن دواكەوتن لە هەندێك ناوەندی دەنگدان هەبوو.

تۆڕی باڵویۆزانی ئازادی كە چاودێری هەڵبژاردنی ئەنجوومەنی نوێنەرانی عێراق دەكەن لە ڕاپۆرتێكیاندا ئاماژە بۆ ئەوە دەكەن، بەپیێ ڕێكارەكان بردنە ژوورەوەی مۆبایل قەدەغەبوو، بەڵام لەهەندێك شوێن چاودێرەكانمان سەرپێچان لەوبارەیەوە تۆماركردووە.

 

دەقی ڕاپۆرتی دووەم لەبارەی بەڕێوەچوونی دەنگدانی تایبەت 8ی ئوكتۆبەری 2021
سەرلەبەیانی ئەمڕۆ هەینی رێكەوتی 8ی ئوكتۆبەری 2021 كاتژمێر حەوتی بەیانی دەنگدانی تایبەت بەهەموو ئەو توێژانە دەستی پێكرد كە بە پێی بڕیاری كۆمسیۆنی هەڵبژاردنەكانی عێراق مافی دەنگدانیان هەبوو لە سەرجەم پارێزگاكانی عێراق و هەرێمی كوردستان.
هەرچەندە پڕۆسەی دەنگدان بەشێوەیەكی گشتی ئاسایی بەڕێوەچوو لەكاتژمێرەكانی بەیانیدا بەدەمەوەچوونێكی زۆر هەبوو بۆ دەنگدان، بەڵام لەگەڵ ئەوەشدا چاودێرەكانمان ژمارەیەك لادان و سەرپێچیان تۆماركردووە كە لای خوارەوە بەوردی هەندێكیان دەخەینەڕوو:
یەكەم: دواكەوتن لە دەستپێكردن بە دەنگدان
بەهۆی لەكاركەوتنی هەندێك لە ئامێرەكان و كەم شارەزایی هەندێك لە كارمەندانی كۆمسیۆن دواكەوتن لە هەندێك ناوەندی دەنگدان هەبوو ،لای خوارەوە هەندێك لە نموونەكانی سەرپێچیكردن:
1-لە بنكەی ژمارە 121103 وێستگەی 3 لە گەڕەكی تەیراوەی شاری هەولێر تیمی كۆمسیۆن ناشارەزابوون لە بەكارهێنانی ئامێرەكانی دەنگدان تا ئەو كاتەی كارمەندی وێستگەكانی دیكە بەهانایانەوە چوون و ئەوەش بووە هۆی دواكەوتن و قەرەباڵەغی دروستكردن.
2-لە ناوەندی عەلیاوە ژمارە 121750 وێستگەی یەكەم لە قەزای كۆیەی شاری هەولێر بەهۆی لاوازی و كەم شارەزایی كارمەندانی كۆمسیۆن دەنگدان لە كاتژمێر 7:22 خولەك دەستی پێكرد و دواتریش لە كاتژمێر 10ی بەیانی بۆ ماوەی 20 خوولەكی دیكە راوەستا.
3-لە پارێزگای دهۆك لە قەزای ئامێدی لە ناوەندی ژمارە 123750 لە وێستگەی 3 ئامێری تحقق بۆ نزیكەی 10 خوولەك لەكار وەستا و قەرەبالەغی و دواكەوتنی لێكەوتەوە.
4-لە پارێزگای نەجەف بەتایبەتی لە ناوەندی زیوف ئەلرەحمان وێستگەی سێیەم ئامێرەكانی دەنگدان بۆ ماوەی زیاتر لە 20 خوولەك راوەستان و پاشانیش جارێكی دیكە ئامێری پەنجەمۆر راوەستا كە بووە هۆی دەمەقاڵێ لەنێوان كارمەندانی كۆمسیۆن و هەندێك لە دەنگدەرانی تایبەت.
5-لە پارێزگای بابل لە ناوەندی ژمارە 259950 وێستگەی یەكەم چەندین جار ئامێرەكان لەكاركەوتن.هەرجارێكیشیان زیاتر لە 10 خوولەكی پێدەچوو.كە دوایین جار لە كاتژمێر 12:05 تاوەكو 12:45 ڕاوەستا.
6-لە پارێزگای سلێمانی لە ناوەندی شەهید غەفوور ژمارە 226551 كاتژمێر حەوتی بەیانی بنكەكە كرایەوە بەڵام نەتوانرا تاوەكو كاتژمێر 8:15 خوولەك دەنگدان دەستپێبكات.
دووەم: وێنەگرتن و دەنگدانی بەكۆمەڵ
بەپیێ ڕێكارەكان بردنە ژوورەوەی مۆبایل قەدەغەبوو بەڵام لەهەندێك شوێن چاودێرەكانمان سەرپێچان لەوبارەیەوە تۆماركردووە، لەوانە:
1-لە قەزای كفری سەربەپارێزگای سلێمانی لەگەڕەكی مامۆستایان لە بنكەی ژمارە 127750 وێستگەی دووەم مۆبایل برابووە ژوورەوەو كارتی دەنگدانی پێ وێنەگیرابوو.
2-لە قەزاری كەلاری سەربەپارێزگای سلێمانی لە بنكەی ژمارە 51 وێستگەی سێیەم مۆبایل برابووە ژووەرەوە و وێنەی فۆڕ‌می دەنگدانی پێ گیرابوو.
3-لە قەزاری كەلاری سەربەپارێزگای سلێمانی لە بنكەی ژمارە 51 وێستگەی سێیەم لە یەكێك لە كابینەكان زیاتر لە كەسێك پێكەوە دەنگیان دەدا.
سێیەم: بەردەوامبوون لە بانگەشەی هەڵبژاردنی پاڵێوراوەكان
1-لە پارێزگای نەجەف بەتایبەتی لە ناوەندی زیوف ئەلرەحمان وێستگەی سێیەم بانگەشەی هەڵبژاردنی پاڵێوراوانی ڕەوتی سەدر بەردەوام بوو لایەنگرانیشیان لەوێ گردببوونەوە.
2-لە كۆمەڵگای زریلاند لە پارێزگای دهۆك ژمارە 22348 وێستگەی دووەم لەپێش بنكەكە كارتی بانگەشەی یەكێ لە پاڵێوراوان دابەشدەكرا و لایەنگرانی لەگەڵ دەنگدەران دەچوونە نێو بنكەكەوە بۆ ئەوەی دەنگ بە پاڵێوراوەكەیان بدەن.
3-لە ناوەندی عەلیاوە ژمارە 121750 وێستگەی یەكەم لە قەزای كۆیەی شاری هەولێر بەرپرسانی یەكێك لە حزبەكان لەبەردەم بنكەی دەنگدان راوەستابوو بۆ جەختكردنەوە لەوەی كە دەبێت دەنگ بە پاڵێوراوێكی دیاریكراوبدەن.
چوارەم:سنوورداركردنی كاری چاودێران
بڕیاری رێگریكردن لەبردنە ژوورەوەی مۆبایل لەلای چاودێرانی ناوخۆییەوە كێشە و گرفتی بۆ چاودێرانی ناوخۆیی دروستكرد و ئەركیانی قورس كرد بەشێوەیەك كە نەتوانن وەكو پێویست ئەركەكانیان راپەڕێنن. جگە لەوەش ناپیشەیی مامەڵەكردن لەگەڵ چاودێران و لەهەندێك دەركردن و بەكارهێنانی توندوتیژی لەلایەن لایەنی سیاسیەوە بوونی هەبوو،لەنێویشیدا بەرامبەر بە چاودێرانی تۆڕەكەمان(تۆڕی باڵوێزانی ئازادی)،لای خوارەوە هەندێك نموونە لەو پێشێلكارییانە:
1-لە كۆمەڵگای زریلاند لە پارێزگای دهۆك ژمارە 22348 وێستگەی یەكەم كاری چاودێرە‌ ناوخۆیی و نێودەوڵەتیەكان سنوورداكرابوو بەشێوەیەكی خراپ مامەڵەیان لەگەڵدا كرا.
2-لە پارێزگای نەجەف بەتایبەتی لە ناوەندی زیوف ئەلرەحمان وێستگەی سێیەم كاری چاودێری تۆڕەكەمان سنوورداركرا،لە بەردەم وێستگەی دەنگدانیش لەلایەن لایەنێكی سیاسی دیاریكراوەو توندوتیژی بەرامبەر بەكارهێنرا.
3-لە پارێزگای كەركوك لە ناوەندی مسجد ئەلئەقسا لە رێگەی بەغدا وێستگەی ژمارە 3 چاودێرێكمان بۆ ماوەیەكی زۆر لە بنكەكە دوورخرایەوە و دواتر رێگەی پێدرا بگەڕێتەوە ناوەندەكە.