سەردێر

عیراق لەبەرانبەر لوبناندا هەوڵی بردنەوە دەدات

خەڵك-

هەڵبژاردەی عیراق بۆ درێژەدان بە كاروانی گەیشتن بە مۆندیالی قەتەر 2022، سەرلەئێواری ئەمڕۆ پێنج شەممە، لە خولی سێیەمی یارییەكانی پاڵاوتنی جامی جیهان، لەبەرانبەر هەڵبژاردەی لوبناندا هەوڵی بردنەوە دەدات و دەیەوێت جەماوەری توڕەی عیراقی لەپاش دۆڕاندنی یاریی پێشووی لەبەرانبەر ئێران، ئاشتبكاتەوە.

یاریی ئەمڕۆی عیراق بەرانبەر  لوبنان، لە كاتژمێر 5.30 بە كاتی مەككەی پیرۆز بەڕێوەدەچێت و دەبێت شێرەكانی ڕافیدەین بە هەر جۆرێك بێت سێ‌ خاڵی یارییەكە مسۆگەر بكەن، بەپێچەوانەوە هێندەی تر لە پاش یەكسانی یارییەكەی كۆریای باشوور و دۆڕاندنەكەی ئێران، هیوای سەركەوتن و گەیشتنيان بە مۆندیال ئەستەم دەبێت.

دیك ئەدڤۆكاتی هۆڵەندی، ڕاهێنەری هەڵبژاردەی عیراق، لەم یارییەدا دەیەوێت بە پێكهاتەیەكی تر و بە شێوازێكی تر هەڵبژاردەی عیراق بخاتەڕوو، هەوڵیش دەدات قەرەبووی ئەو نسكۆیە بكاتەوە كە لە یاریی پێشوودا لە بەرانبەر ئێران تووشی بوو كە بە ئەنجامی 3-0 دۆڕاندی.