سەردێر

چیای قەرەچوغ.. پێشمەرگە پیلانێكی داعش شكست پێدەهێنێت

خەڵك

پێشمەرگە خۆبەخشەكانی سنووری مەخمور و چیای قەرەچوخ بۆسەیەكی پاشماوەكانی داعشیان لە گوندەكانی ئەو سنوورە پووچەڵكردەوە، كە بەنیازبوو بۆ كردەوەی تیرۆریستی و سەرانە وەرگرتن و بێزاركردنی خەڵكی ئەو ناوچانە جێبەجێی بكەن.
غازی فەیسەڵ فەرماندەی پێشمەرگەی خۆبەخش لە سنووری مەخمور و چیای قەرەچوغ بە ماڵپەڕی فەرمی یەكێتی ڕاگەیاند: لەبەردەوامی كارە تیرۆریستییەكانی داعش لە سنووری مەخمور و گوندەكانی دەوروبەری، شەوی ڕابردوو چەكدارانی داعش بۆسەیەكیان لە نێوان هەردوو گوندی (مەعمەل ئۆمەران و گۆپتەپە) دانابووەوە، بەڵام لەلایەن پێشمەرگە خۆبەخشەكان پیلانەكەیان پووچەڵكرایەوە.

غازی فەیسەڵ وتیشی: ئامانجی پاشماوەكانی داعش لەو بۆسەیە، ئەنجامدانی كاری تیرۆریستی و بێزاركردن و وەرگرتنی سەرانەیە لە هاووڵاتیانی سنوورەكە، وەك لەماوەكانی ڕابردوو ئەنجامیانداوە، بەڵام ئێمە ڕووبەڕووبەریان بووینەوە و دواتر هێزە عیراقییەكان بەهانامانەوە هاتن.

ئەو فەرماندەیەی پێشمەرگەی خۆبەخش لە سنووری مەخمور و چیای قەرەچوغ ئەوەشی خستەڕوو: لەئەنجامی ئەو ڕووبەرووبونەوەیە شەڕەتەقە لەنێوان هەردوولا دروستبوو، لەئەنجامدا تیرۆریستانی داعش بەرەو شاخی قەرەچوغ رایانكرد، لەدوای خۆشیان چەندین كەرەستە و پێداویستی كارە تیرۆریستییەكانیان بەجێما و كەوتە دەست پێشمەرگە خۆبەخشەكان.