سەردێر

كۆمسیۆن: هەموو شاندەكانی چاودێری گەیشتنە عیراق

خەڵك-
كۆمسیۆنی باڵای سەربەخۆی هەڵبژاردن لە عیراق، میكانیزمەكانی گواستنەوەی سندوقەكانی دەنگدان ئاشكرا دەكات و ئاماژە بەو سندوقانە دەكات كە بۆ بەغدا دەگوازرێنەوە، تەئكید لەسەر گەیشتنی هەموو شاندەكانی چاودێریی هەڵبژاردنیش دەكاتەوە.

داود سەلمان خزر، بەڕێوەبەری ڕێكارەكان و ڕاهێنان لە كۆمسیۆن لە لێدوانێكیدا بۆ ئاژانسی فەرمی (العراقیە) ڕایگەیاند”سندوقەكان لە ناوەندەكانی دەنگدانەوە بۆ ناوەندەكانی تۆمار دەگوازرێنەوە و بە هەمان ئۆتۆمبێلەكانیش بۆ گەنجینەی پارێزگاكە دەبرێن”.

بە وتەی سەلمان خزر”ئەو سندوقانەی دەگوازرێنەوە بۆ بەغدا، تەنیا ئەوانەن كە سكاڵا و تانەیان لەسەرە، بڕیاری ئەنجومەنی كۆمسیارانیش لەو بارەیەوە ئەنجامدانی جیاكردنەوەی دەستییە، بۆیە ئەو سندوقانە بەپێی پلانی ئەمنی بۆ پاراستنیان دەگوازرێنەوە بۆ بەغدا، بۆ مەبەستی ئەنجامدانی پرۆسەی جیاكردنەوەی دەستی لە دوای گەیشتنی سكاڵا و تانەكان لەسەر ئەو سندوقانە”.