سەردێر

وەزارەتی پەروەردە پەیامێكی بۆ مامۆستایان بڵاوكردەوە

خەڵك-
وەزارەتی پەروەردەی حكومەتی هەرێمی كوردستان بەبۆنەی ڕۆژی مامۆستایانی كوردستان پەیامێك بڵاودەكاتەوە و ڕایدەگەیەنێت، سەرمان بڵندە بە ئێوەی ئازیزو ماندوونەناس كە هەمیشە نموونەی دڵسۆزی ‌و لە خۆبوردەیی بوون‌.

وەزارەتی پەروەردەی هەرێم لە پەیامەكەیدا ئاماژەی بەوەكردووە، مامۆستایان دڵنیا دەكەینەوە كە بەردەوام دەبین لەسەر ئەو پڕەنسیپە نەگۆڕەی لە سەرشانمانە بۆ خزمەت كردنی مامۆستایانی كوردستان.

پەیامی وەزارەتی پەروەردە بەبۆنەی ڕۆژی مامۆستایانی كوردستان
بە بۆنەی رۆژی مامۆستایانی كوردستان، كە ساڵانە لە ٦ی١٠ ئەم رۆژە بەرز ڕادەگیریت، بەم بۆنەیەوە جوانترین و گەرمترین پیرۆزبایی خۆمانتان پێ ڕادەگەینین، رێز و سوپاس ئاڕاستەی سەرجەم مامۆستایان و تەواوی پەروەردەكاران دەكەین.
لەم ڕۆژە پیرۆز و پڕ شكۆیەدا وەكو وەزارەتی پەروەردەی حكومەتی هەرێمی كوردستان بە هەموو خۆشەویستی‌و شانازییەكەوە پێتان دەڵێین سەرمان بڵندە بە ئێوەی ئازیزو ماندوونەناس كە هەمیشە نموونەی دڵسۆزی‌و لە خۆبوردەیی بوون‌ بۆ گەیاندنی پەیامە پیرۆزەكانتان لە ناو پۆل‌ و قوتابخانەكاندا لە پێناو دروست كردن‌و پێگەیاندنی‌و بونیادنانی نەوەیەكی كاراو زیندوو بۆ ئایندەو دواڕۆژی گەلەكەمان، بەشداری و ڕۆڵی مامۆستایان لە شۆرشی رزگاریخوازیی گەلی كوردستان و قۆناغی ئازادی دا رۆڵێكی بەرچاو و لەبیرنەكراوە. هەر بۆیە لەم یادەوە مامۆستایان دڵنیا دەكەینەوە كە بەردەوام دەبین لەسەر ئەو پڕەنسیپە نەگۆڕەی لە سەرشانمانە بۆ خزمەت كردنی مامۆستایانی كوردستان.
وەزارەتی پەروەردە
٦ی١٠ی٢٠٢١