سەردێر

ئەمڕۆ عیراق بە جلی سەوزەوە ڕووبەڕووی ئیمارات دەبێتەوە

خەڵك-
یەكێتی تۆپی پێی عیراق، ڕەنگی ئەو جلە ڕادەگەیەنێت كە هەڵبژاردەی ئۆڵۆمپی عیراق لە یاریی ئەمڕۆی بەرانبەر بە هەڵبژاردەی ئیمارات لەبەری دەكات لە پاڵەوانێتنی خۆرئاوای ئاسیا كە ئێستا لە شاری دەمامی سعودیە یارییەكانی بەڕێوەدەچێت.

بەپێی بەیاننامەیەك كە لەلایەن یەكێتی تۆپی پێی عیراقەوە بڵاوكرایەوە، هەڵبژاردەی ئۆڵۆمپی لە دووەم یاریدا لە چوارچێوەی پاڵەوانێتی خۆرئاوای ئاسیا و لە گروپی دوو كە ئەمڕۆ چوار شەممە بەڕێوەدەچێت، جلی سەوز لەبەردەكات لەبەرانبەر هەڵبژاردەی ئۆڵۆمپی ئیمارات.

هەڵبژاردەی عیراق پێشتر بە گۆڵێكی بێ‌ بەرانبەر لە هەڵبژاردەی فەلەستینی بردەوە، هەڵبژاردەی ئیماراتیش لە هەمان گروپدا بە سێ‌ گۆڵی بێ‌ بەرانبەر لە هەڵبژاردەی لوبنانی بردەوە، لەئێستاشدا ئیمارات بە جیاوازیی گۆڵ لەگەڵ عیراق، یەكەمی ڕیزبەندی گروپەكەی گرتووە.