سەردێر

بەنزینە 690 دیناریەكەی عێراق كێشەی بۆ دروست بوو

خەڵك –
ماوەی چەند ڕۆژێكە ئەو بەنزینەی بڕیار بوو بەغدا ڕۆژانە لیتری بە 690 دینار بۆ شارەكانی هەرێمی كوردستانی ڕەوانە بكات نەهاتووە و بەشێك لە میدیاكان باس لەوە دەكەن، كە عێراق وەك سزایەك لە پای “كۆنگرەی هەولێر” بەنزینەكەی ڕاگرتووە.

بەنزینخانەكانی سلێمانی، كە بەنزینی 690 دیناری عێراقی تێدا دەفرۆشرێت دوای ئەوەی (خەڵك) بەدواداچوونی بۆ كردووە، ماوەی چەند ڕۆژێكە هیچ جۆرە بەنزینێكی عێراقییان بۆ نەهاتووە و هۆكارەكەشی نازانن.

سەرچاوەیەكی تایبەت بە (خەڵك) ڕایگەیاند، لە ئێستادا لە بەغدا پشووە و هیچ دەوامێك نیە، چاوەڕێی سبەینێ دەكەین لەگەڵ دەست پێكردنەوەی دەوام ئەگەر بەنزین ڕەوانە كرا ئەوە كێشەكە چارەسەر دەبێت و هاووڵاتیان دەتوانن سوود لەو بەنزینە وەربگرن، بە پێچەوانە لایەنی پەیوەندیدار بەدواداچوونی بۆ دەكات.

بەپێی بەدواداچوونی پەیامنێری (خەڵك) لە سلێمانی، ئەو وێستگانەی، كە لە سلێمانی كاریان فرۆشتنی بەنزینی 690 دیناری بەغدایە، نرخەكانیان لەسەر تابلۆی ڕیكلامەكان كوژاندۆتەوە.

هەر بەپێی بەدواداچوونەكە، بەشێك لەو بەنزینخانانە ڕایانگەیاندووە، كە ماوەی نزیكەی هەفتەیەكە ئەو بەنزینە عێراقییەیان بۆ نەهاتووە و تا ئێستا چاوەڕێن بەدەستیان بگات و هۆكارەكەشی نازانن بۆچی ڕاگیراوە.

لە ئێستادا لە شاری سلێمانی بەنزینی نۆرماڵ بە 750 دینارە و موحەسەن بە 900 دینار و سوپەر 975 دینارە بۆ لیترێك و لە چەند بەنزینخانەیەكیش بەنزینی كار هەیە بە 730 دینار.

هاوكات، بەپێی بەدواداچوونی پەیامنێری (خەڵك) لە هەولێر، چەند نرخێكی بەنزینی نۆرماڵ هەیە، كە لە بەنزینخانەكانی سەن ئۆیل بەنزینی كار بە 660 دینارە و لە هەندێكی دیكە بە 730 دینار دەفرۆشرێت و لە چەند بەنزینخانەیەكیش بە 650 دینارە، بەڵام بەنزینی نۆرماڵی بازرگانی بە 775 دینارە.