سەردێر

لەسەر خراپی بەشە ئاردی مانگانە لە سلێمانی داوای لیژنەی بەغدا دەكرێت

خەڵك ـ نزار جەزا
خراپی بەشە ئاردی مانگانەی هاووڵاتییان بووەتە جێگەی پرسیار و داوا لەوەزارەتی بازرگانی عێراق دەكرێت لیژنەیەكی بەدواداچون بنێرێتە سلێمانی، ئەمەش بەهۆی ئەوەی، بەرپرسانی سلێمانی دەڵێن: “گەنمی سلێمانی خراپە، بەڵام هەمان گەنم لەكارگەكانی كەرتی تایبەت ڕیكلامی باشترین ئاردی بۆ دەكرێت”.

ئەو مانگەی گەنم لەكەركوكەوە بهێنرێتە سلێمانی و بەشە ئاردی مانگانەی هاووڵاتییانی لێ دروست بكرێت، تاڕادەیەك باشە و هاووڵاتییان دەتوانن نانی لێبكەن، بەڵام هەر مانگێك گەنمی سلێمانی بەكاربێت، كەڵكی نان لێكردنیشی نییە و هاووڵاتییان دەیفرۆشنەوە.

كاسترۆ مەعروف، سەرۆكی لیژنەی كشتوكاڵ و سەرچاوەكانی ئاو لە ئەنجوومەنی پارێزگای سلێمانی بە (خەڵك)ی ڕاگەیاند، شتێكی نامۆیە، كە دەوترێت گەنم لەپارێزگای كەركوك كێشەی نییە، بەڵام گەنمی پارێزگاكانی سلێمانی و هەڵەبجە و ئیدارەكانی گەرمیان و ڕاپەڕین باش نییە.

ئاماژەی بەئەوەشدا، ئەم بابەتە پێویستی بە بەدواداچوونی جدی لەلایەن وەزارەتی بازرگانی عێراق هەیە و پێویستە لیژنەیەكی تایبەت بنێرێت.

زیاتر ڕوونیكردەوە، هاتنی ئەو لیژنەیە پێویستە چونكە، زەوییەكانی ئەم سنوورە بەراورد بەكەركوك باشترە و جوتیارەكانی ئێرە بەرهەمی زیاتریان هەیە و بەخزمەتترن بۆ زەوییەكانیان، بۆیە جێگەی پرسیار و سەرسوڕمانە بۆچی گەنمی كەركوك باشبێت، بەڵام گەنمی ئەم سنوورە باش نەبێت.

ئەوەشی باسكرد، نابێت خاتری كەس بگیرێت و بەڕوونی هۆكاری ئەم بابەتە ئاشكرابكرێت، كە هۆكاری ئەم جیاوازییە چییە، بۆئەمەش دەبێت سایلۆكان و بەڕێوەبەرایەتی دروستكراوی بەرهەمی دانەوێڵەی سلێمانی وەڵامێكی باشیان هەبێت.

وتیشی: لەئێستادا بەڕێوەبەرایەتی دروستكراوی دانەوێڵەی سلێمانی پێویستە نوسراو بكەن بۆ وەزارەتی بازرگانی عێراق، بۆئەوەی بێن و لێكۆڵینەوە لەو بابەتە بكەن (هەرچەندە پێشتریش كردوویانە)، چونكە دەبێت ئەو بەشە ئاردەی مانگانە وەریدەگرن دەبێت بەكەڵكی ئەوەبێت نانی لێ بكرێت.

ئەوەشی باسكرد، ئەگەر ئەم بابەتە یەكلایی نەكرێتەوە هەموو دامودەزگاكانی سنووری سلێمانی دەكەونە ژێر پرسیارەوە.

ناوبراو ئەوەشی خستەڕوو، ئەنجوومەنی پارێزگای سلێمانی پێشتر چەندجارێك نووسراوی بۆ ئەو بابەتە كردووە، ئێستاش بەهۆی هەڵبژاردنەكانەوە ئەم پرسە دواخراوە بۆ دوای هەڵبژاردن و لەو كاتەدا بانگێشتی بەڕێوەبەرایەتی سایلۆ و بەڕێوەبەرایەتی دروستكراوی بەرهەمی دانەوێڵە دەكەن، بۆئەوەی ئەم بابەتە ڕوونبكەنەوە و دەیانخەنە ژێر پرسیارەوە.

ئاماژەی بەئەوەشدا، ئەگەر ئەم گەنمەی سلێمانی هێندە خراپە، بۆچی كارگەكانی كەرتی تایبەت ڕیكلام بۆئەوە دەكەن، كە گەنمی ناوخۆ دەكڕن و باشترین ئاردی لێ دروست دەكەن؟ كەواتە بۆچی سایلۆكانیش ناتوانن هاوشێوەی ئەم كارگانە ئاردی جوان بەرهەمبێنن؟

زیاتر ڕوونیكردەوە، ئەمانە پرسیارن و لەو كۆبوونەوەیەی دوای هەڵبژاردندا دەیخەنە بەرباس، ئەگەر بابەتەكە ڕوون نەكرایەوە، وەك ئەنجوومەنی پارێزگای سلێمانی بەفەرمی داوا لەوەزارەتی بازرگانی عێراق دەكەن، بۆئەوەی لیژنەیەك بنێرن و بەدواداچوون بۆ ئەم بابەتە بكەن.