سەردێر

(خەڵك) وردەكاری نادادپەروەری دەرماڵەی فەرمانبەران ‌و چارەسەرەكەی ئاشكرادەكات

خەڵك-

ئەندامی لیژنەی دارایی لە پەڕلەمانی كوردستان ڕایدەگەیەنێت، بەهۆی حزبایەتی و واسیتەوە بەستنی دەرماڵەكان نادادپەروەرییەكی زۆری لە مووچەی فەرمانبەران دروست كردووە.

بەپێی زانیارییەكان، ژمارەیەك لە فەرمانبەران بەهۆی كەمی دەرماڵەی وەزارەتەكەیان خۆیان بۆ وەزارەتێكی دیكە دەگوازنەوە، كە دەرماڵەكەی زیاترە، ئەمەش لاسەنگی لە شێوازی بوونی فەرمانبەران لە وەزارەتەكان دروست دەكات، هاوكات نادادپەروەرییەكیش لە مووچەی و پاداشتی فەرمانبەران دروست دەكات.

عومەر گوڵپی، ئەندامی لیژنەی دارایی لە پەڕلەمانی كوردستان بە (خەڵك)ی ڕاگەیاند، حكومەت بۆ مامەڵەكردن لە مافی فەرمانبەران بەشێوەیەكی دادپەروەرانە بۆتەهۆی ئەوەی لە هەندێك وەزارەت مووچە زیاد بێت بەهۆی دەرماڵەی جیاوازەوە، لە هەندێكیتر یان هەندێك جۆری پسپۆڕییەوە دەرماڵەكان وەكو پێویست نەبن.

وتیشی، “یاسای چاكسازی بڕگەیەكی تێدایە، كە حكومەت ئەركیەتی پێداچوونەوە بكات بە دەرماڵەكان و هەوڵی دادپەروەری بدات لەنێوان دەرماڵەكان، بەتایبەت هەندێك شوێن و پسپۆڕی هەندێك وەزارەت هەیە دەرماڵەكانیان زۆر كەمە، هەندێك فەرمانبەر هەیە دوای 15 ساڵ دەرماڵەكەی 265 هەزارە، چۆن دەبێت فەرمانبەر دوای ئەو هەموو خزمەتە مووچەكەی ئەوەندە بێت و فەرمانبەریش هەبێت مووچەكەی بگاتە 2 ملیۆن و نیو، ئەمە نادادپەروەری دروست دەكات”.

جەختیشی كردەوە، دەبێت ئەو داهاتەی دەگەڕێتەوە لە چوارچێوەی یاسای چاكسازی بۆ كەمترین مووچەی خانەنشین و چاكردنی هەندێك دەرماڵەی كەم خەرج بكرێتەوە.

ئاشكراشیكرد، ئەو دەرماڵانەی بەپێی یاسای و ڕێنمایی دانراون و دروستە و كێشە نییە، بەڵام كێشە لە بەستنی دەرماڵەكاندایە، كە لە هەندێك شوێن بەهۆی حزبایەتی و واسیتەوە هەندێك دەرماڵە بەستراوە، كە یاسایی نییە، حكومەت دەبێت پێداچوونەوە بەوەدابكات و بەپێی یاسای مامەڵە لەگەڵ فەرمانبەران بكات و جیاوازی لەنێوانیاندا نەكات، لەسەر بنەمای حزبایەتی و خزمایەتی نەبێت، بەڵكو هەر فەرمانبەرێك لە ڕێنماییەكاندا هەیە بیداتە فەرمانبەران.

گوڵپی وتی، “هیچ وادەیەك نییە بۆ جێبەجێكردنی چارەسەركردنی ئەو نادادپەروەرییە، هەرچەندە یاسای چاكسازی چۆتە بواری جێبەجێكردنەوە و پێویستە ئەم پێداچوونەوەیە و دادپەروەرییە ئەوەندە درێژ خایەن نەبێت و لە چەند مانگی داهاتوودا كۆتایی پێبهێنرێت”.