سەردێر

ئەنجامی هەڵبژاردنەكانی ئەڵمانیا ئاشكرا كرا

حوكمی 16 ساڵەی مێركڵ كۆتایی پێهات

خەڵك-

دوێنێ 26ی ئەیلول هەڵبژاردنی پەرلەمانی ئەڵمانیا بەبەشداری 47 پارتی سیاسی بەڕێوەچوو كە زیاتر لە 60 ملیۆن كەس مافی دەنگدانیان هەبوو، بەگوێرەی ئەنجامەكانی كۆتایی پرۆسەكەش پارتی سۆسیال دیموكرات بەبەدەستهێنانی 25.8%ی دەنگەكان و بەجیاوازییەكی كەم پێش پارتی كریستییان دیموكرات (پارتەكەی ئەنگێلا مێركڵ) كەوت كە 24.1%ی دەنگەكانی بەدەستهێناوە، هەروەها پارتی سەوزیش رێژەی دەنگەكانی بۆ دوبەرانبەر زیادكردوە.

كاندیدی حیزبەكانی یەكێتی كریستیان دیموكرات و یەكێتی سۆشیال كریستیان ئارمین لاشێت و كاندیدی حیزبی سۆشیال دیموكرات كە جێگری ڕاوێژكاری ئەڵمانیاشە ئۆلاف شۆڵز كێبڕكێ دەكەن لەسەر ئەوەی كامیان ببنە ڕابەری گەورەترین ئابووری ئەوروپا، لەكاتێكدا ڕاوێژكاری ئەڵمانیا ئانگێلا مێركڵ دوای 16 ساڵ لەسەر دەسەڵات، دەستبەرداری پۆستەكەی دەبێت.

بەپێی ئەوەی هیچ كام لە حزبەكان 30 %ی دەنگەكان یاخود زیاترییان بەدەست نەهێناوە، هیچ كام لە حزبەكانی ئەڵمانیا نابنە زۆرینە، بۆیە حزبێك بە تەنها ناتوانێت حكومەت پێكبهێنێت.

كاندیدە هەڵبژێردراوەكان پێدەچێت حكومەتێكی هاوپەیمانی پێكبهێنن، بەڵام ڕێكەوتن لەسەر ئەو هاوپەیمانێتیە نوێیە لەوانەیە چەند مانگێك بخایەنێت، هەروەها لەوانەیە حیزبە بچوكەكانی دیكەی وەكو حیزبی سەوز و حیزبی لیبڕاڵی دیموكراتی ئازادیش لەخۆبگرێت.

كاندیدی حیزبی سۆشیال دیموكرات ئۆلاف شۆڵز وتی ” ئێستا لە سەرجەم ئامارەكاندا لەپێشەوەین.”

لەلای خۆیەوە ئارمین لاشێتی كاندیدی حیزبەكانی یەكێتی كریستیان دیموكرات و یەكێتی سۆشیال كریستیان وتی”هەموو جارێك بەوشێوەیە نەبووە ڕاوێژكاری ئەڵمانیا لە حزبی یەكەمدا بێت. حكومەتێكم دەوێت سەرجەم هاوبەشەكان بەشداربن تیایدا، هەمووان ببیندرێن، نەك حكومەتێك كە تەنها ڕاوێژكار تیایدا بدرەوشێتەوە.”

هەریەك لە شۆڵز و لاشێت ئاماژەیان بەوەدا دەیانەوێت بەر لە كریسمس هاوپەیمانێتیە نوێیەكە پێكبهێنن.