سەردێر

ئەمریكا، پشتیوانی سیستەمی بەرگری دژە مووشەكی ئیسرائیلی پەسەند كرد

خەڵك-

ئەنجومەنی نوێنەرانی ئەمەریكا، پڕۆژە یاسای یارمەتی ملیارێك دۆلاری بۆ سیستەمی بەرگری دژە مووشەكی ئیسرائیل پەسەند كرد.

ئاژانسی ئەسۆشیەیتد پرێس بڵاویكردەوە، نوێنەرانی دیموكرات بە پەسەندكردنی ئەو پڕۆژە یاسایە، ویستویانە بەشێوەیەك لە شێوەكان وەڵامی ئەو ڕەخنانەی كۆمارییەكان بدەنەوە كە پێیانوایە دیموكراتەكان پشتیوانی ئیسرائیل ناكەن.

لۆید ئۆستن وەزیری بەرگری ئەمەریكا ئێوارەی پێنج شەممە لە گفتوگۆیەكدا لەگەڵ هاوتا ئیسرائیلییەكەی، بێنی گانتز پەیامی پشتیوانی بەڕێوبەرایەتی جۆو بایدنی بۆ بەهێزكردنی سیستەمی دژە مووشەكی ئیسرائیل ڕاگەیاند.

دیموكراتەكانی ئەنجومەنی نوێنەران لە سەرەتادا بەنیازبوون لەگەڵ پڕۆژە یاسای بودجەی حكومەتدا پێداچوونەوە بە پڕۆژە یاسای یارمەتییەكەش بكەن، بەڵام دوای دژایەتیكردنی هەندێك لە نوێنەرانی كۆمسیۆن، بڕیارەكە هەڵوەشایەوە و سەركردایەتی حیزبی دیموكرات بڕیاریدا بە جیا دەنگ لەسەر پڕۆژە یاسای یارمەتی بۆ سیستەمی دژە مووشەكی ئیسرائیل بدرێت.

پڕۆژە یاساكە لە كۆتاییدا بە 420 دەنگی ئەرێنی لە بەرامبەر 9 دەنگی نەرێنیدا پەسەند كرا و بۆ پەسەندكردنی كۆتاییش ڕەوانەی ئەنجومەنی سینات دەكریت.

ڕۆزا دیلارۆ، سەرۆكی لیژنەی تەرخانكردنی بۆدجەی ئەنجومەنی نوێنەران لە حیزنی دیموكراتی ڕایگەیاند، تێپەڕاندنی ئەم پرۆژە یاسایە پیشاندەری ئەوەیە كە پشتیوانی و پابەندبوونی كۆنگرێس بە هاوڕێ و هاوپەیمانمان ئیسرائیل، لە دەرەوەی حزبایەتییە.