سەردێر

داوادەكرێت دۆسێی جینۆساید نەكرێتە بانگەشەی هەڵبژاردن

خەڵك- ئارام سەردار

سەرپەرشتیاری ڕێكخراوی كوردستان بێ جینۆساید داوا دەكات، بۆ كۆكردنەوەی دەنگ بۆ كەس و لیست و حیزب، دۆسییەكانی جینۆساید بەكارنەهێندرێت.

عەلی سیاسی، سەرپەرشتیاری ڕێكخراوی كوردستان بێ جینۆساید بە(خەڵك)ی ڕاگەیاند، هەر كاتێك هەڵمەتی هەڵبژاردنەكان كوردستان و عێراق دێنە پێشەوە وەك لە ڕابردوو بینیومانە, لیست و حیزب و كاندیدەكان كە هەندێكیان نە پێشتر و نە دوای هەڵبژاردنەكە دۆسیەكانی جینۆساید كاری ئەوان نەبووە، بەڵام ئەم دۆسیەیانە دەكەنە بابەتی بانگەشەی هەڵبژاردنی خۆیان, لێ دواتر كە دەگەنە پەڕلەمان, ئیتر جینۆسایدو قوربانیانیان لە بیرنامێنێ و جورئەت ناكەن ڕەخنە بگرن لە هەڵوێستی حیزبەكانیان لە بەرامبەر تاوانباران وەك لە رابردوو ئەزموونمان كردووە.

دەشڵێت، ڕەخنەكانمان ڕوو لە حكومەت و حیزب و لیست و كەسەكانە, ڕوو لە ئەزموونەكانی ڕابردووە, بۆ دووبارە نەبوونەوەیان لە ئێستاو داهاتوو.

ئەوەش دەخاتەڕوو، ئێمە وەك ١٦ ڕێكخراوی كۆمەڵی مەدەنی داواكارین هیچ لیست و لایەن و كەسێك دۆسیەی جینۆساید و كیمیاباران نەكاتە بابەتی بانگەشەو ڕیكلامی دەنگ كۆكردنەوە.