سەردێر

زیاتر لە 37 هەزار كەس بەرەو هەندەران كۆچیان كردووە

خەڵك-
دەزگای لوتكە بۆ كاروباری ئاوارە و پەنابەران ئاشكرای دەكات، كە لەمساڵدا زیاتر لە 37 هەزار كەس بەرەو وڵاتانی ئەوروپا كۆچیان كردووە.

ئاری جەلال، سەرۆكی دەزگای لوتكە بۆ كاروباری ئاوارە و پەنابەران ئاماری 8 مانگی ئەمساڵی تایبەت بە كۆچ بڵاوكردەوە و ئاماژەی بەوەكردووە، كە 37 هەزار و 250 كەس بەڕێگای جیاواز كۆچیان بەرەو هەندەران كردووە.

ڕاشیگەیاند، لەو ژمارەیە تا ئێستتا 10 كۆچبەر بوونە قوربانی ڕێگای هەندەران و گیانیان لەدەستداوە و 12 كۆچبەریش بێ‌ سەروشوێنن و نەدۆزراونەتەوە.

ساڵانە ژمارەیەكی زۆری هاوولاتیان لە هەرێم و ناوچەكانی عێراقەوە بەرەو وڵاتانی ئەوروپا كۆچ دەكەن و بەهۆی فێڵی بەشێكی قاچاخچی و خراپی و ناسەلامەتی یەخت و بەلەمەكانی پەڕینەوە لە ئاوەكانی نێوان توركیا و یۆنان دەیان هاووڵاتیانی گیانیان لەدەستداوە و بێ‌ سەروشوێن بوون.