سەردێر

چەند ڕۆژێك بۆ خوێندكاران دەبێتە پشووی فەرمی

خەڵك-تەنیا هەورامی

بڕیارە 10ی مانگی داهاتوو هەڵبژاردنی پێشوەختەی پەڕلەمانی عێراق بەڕێوەبچێت و وەزارەتی پەروەردەی حكومەتی هەرێمی كوردستانیش لە نووسراوێكدا پشووەكانی ئەمساڵی ئاشكرا كرد و تیایدا تەنها یەك ڕۆژی بۆ ئەنجامدانی هەڵبژاردنەكان كردە پشوو لەكاتێكدا 3 ڕۆژ دەبنە پشووی فەرمی.

بەپێی ئەو زانیاریانەی لە كۆمسیۆنی هەڵبژاردنەكانی عێراقەوە دەست (خەڵك) كەوتووە، یەك ڕۆژ پشوو بۆ ئەنجامدان و جێبەجێكردنی كاروبارەكانی هەڵبژاردنەكان زۆر كەمە و كۆمسیۆن پێویستی بە چەند ڕۆژێكە بۆ تێپەڕاندنی ئەو بابەتە.

سەرچاوەكەی كۆمسیۆن ئاشكرایكرد، لەبەرئەوەی ئەنجامدانی هەڵبژاردنەكان لە قوتابخانەكان بەڕێوەدەچێت و هاوكات بەشێكی زۆری كارمەندانی كۆمسیۆنیش لە مامۆستایان پێك دێن، كۆمسیۆن پێویستی لانی كەم بە سێ ڕۆژ هەیە تاكو بتوانێت هەڵبژاردنەكان بە ڕێكوپێكی بەڕێوەببات.

ئاشكراشیكرد، هەڵبژاردنەكان لە ڕۆژی 10-10 كە دەكاتە ڕۆژی یەك شەممە بەڕێوەدەچێت و هاوكات بۆ ئامادەكاری هەڵبژاردنەكانیش لانی كەم پێویستیمان بە ڕۆژێك پێش هەڵبژاردنەكان و ڕۆژێك پاش هەڵبژاردنەكان هەیە لە قوتابخانەكان، بۆ ئەو مەبەستەش پێویستە وەزارەتی پەروەدەی حكومەتی هەرێم و حكومەتی عێراق لانی كەم سێ ڕۆژ بكەنە پشوو بۆ پەروەردە.

لە بەدواداچوونێكی (خەڵك) دا ژمارەیەك بەڕێوەبەری قوتابخانە، كە هاوكات كارمەندی كۆمسیۆن بوون بۆ ئەنجامدانی هەڵبژاردنەكان ئاشكرایانكرد، پێویستە ڕۆژێك دیاری بكرێت بۆ چاككردنی وێستگە و هۆڵەكانی هەڵبژاردن، ئەوەش پێوستە سەرجەم كورسییەكانی خوێندكاران ببرێنە دەرەوەی هۆڵەكان، هاوكات ڕۆژێكیش بۆ ئەنجامدانی هەڵبژاردنەكان و ڕۆژێكیش بۆ ڕێكخستنەوەی هۆڵی وانەكانی قوتابخانەكان پێویستە.

ئاماژەیان بۆ ئەوەش كرد، بۆ جێبەجێكردنی پڕۆسەكە لانی كەم پێویستە سێ ڕۆژ بكرێتە پشووی فەرمی، هەرچەند وەزارەت یەك ڕۆژی كردۆتە پشوو.