سەردێر

سەرما و باران بارین لە هەرێم دەستپێدەكات

خەڵك-
شەپۆلێكی هەوای فێنكی ئەوروپا ناوچەكانی هەرێم دەگرێتەوە و لە چەند ناوچەیەكی شاخاوی سنووری بەهۆی دروست بوونی پەڵە هەورەوە ئەگەری بارینی نمە باران هەیە.

محەمەد كەمال، شارەزای كەشناسی بۆ (خەڵك) ئاماژەی بەوەكرد، بەهۆی هاتنی هەوایەكی فێنكەوە لەئەوروپا بۆ دەریای ناوەڕاست پاشان بۆ هەرێمی كوردستان پێشبینی دەكەین لە ئێوارەی ڕۆژی پێنج شەممە 16ـی9ـی2021 پلەكانی گەرما بەڕێژەی 3 بۆ 4 پلەی تر نزم ببنەوە بەتایبەتی لەشەواندا لەهەندێ شوێنی كوێستانی هەست بەسەرما دەكرێت بەتایبەتیش شەوی هەینی لەسەر شەممە.

ڕاشیگەیاند، ئەم نزمبوونەوەیە لە پلەكانی گەرما تا ڕۆژی دوو شەممە 20ـی ئەیلوول بەردەوام دەبێت و دواتر پلەكانی گەرما 2 پلە بەرزدەبنەوە.

ئاماژەی بەوەشكرد، ڕۆژی شەممە هەندێك هەور لەئاسمانی ناوچەكانی هەرێم دەبینرێ و بەدووریشی نازانین لە سنوری ناوچە شاخاوییەكانی ڕۆژهەڵاتی ڕانیە بڕێك بارانی عەشوایی ببارێت.