سەردێر

” پارتی سیاسەتی گشتیی كوردستان دادەڕێژێت”

خەڵك

سكرتێری مەكتەبی سیاسی پارتی دیموكراتی كوردستان رایگەیاند پارتی دیموكراتی كوردستان سیاسەتی گشتی لە كوردستان دادەڕێژێت و هەر خۆشی بەرپرسیارێتیی بڕیارەكان هەڵدەگرێت.

فازیل میرانی سكرتێری مەكتەبی سیاسی پارتی دیموكراتی كوردستان ئەمڕۆ چوار شەممە لە گوتاری خۆیدا لە كۆبوونەوەی یەكێتی لاوانی دیموكراتی كوردستان رایگەیاند، یەكێك لە گرفتەكانی كوردستان فرەحزبییە، بەڵام سیاسەتی گشتی لە هەرێمی كوردستان پارتی دایدەڕێژێت.

میرانی دەشڵێت: هەرێمی كوردستان پشتگیری زۆری لەسەر ئاستی جیهانیدا بەدەستهێناوە و ئەو ڕاستییە هەیە، كە دەڵێن ڕۆژهەڵاتی ناوەڕاست بەبێ چارەسەری دۆزی كورد ئارام نابێت، بەڵام لە عیراقیشدا ئەوە دووبەرامبەر لێكدانەوەی بۆ دەكرێت، لە عێراقدا كێشەی كورد چارەسەر نەكرێت ئەوا عێراق وەك دەوڵەت تەنها ناوی دەمێنێت.

ئەو بەرپرسە باڵایەی پارتی دیموكراتی كوردستان دەڵێت: ڕێبەرایەتیكردنی ئەو دۆزەی كوردیش لە عێراقدا بە حزبێكی وەك پارتی دەكرێت كە هەموو ئەزموونەكانی لەگەڵ حكومەتە یەك لە دوای یەكەكان كردووە و دەتوانێ لە هاوكێشەكاندا باسەكان یەكلایی بكاتەوە.