سەردێر

كەسێك گیانی لەدەستدا و هیچ ناسنامەیەكی پێ نیە

خەڵك-
بەڕێوەبەرایەتی پۆلیسی ڕاپەڕین ئاشكرای دەكات، كە لەسەر ڕێگای سەرەكی ڕانیە لە ڕووداوێكی هاتووچۆدا كەسێك گیانی لەدەستدا و هیچ ناسنامەیەكی پێ نیە.

بەڕێوەبەرایەتی پۆلیسی ڕاپەڕین لە ڕاگەیەنراوێكدا ئاماژەی بەوەكردووە، نزیك كاتژمێر ٥ی ئێوارەی ئەمڕۆ لەسەر ڕێگای سەرەكی ڕانیە-دەربەند لە ڕووداوێكی هاتووچۆدا لە جۆری پێكدادان لە نێوان ئۆتۆمبیلی بارهەڵگر و ئۆتۆمبیلێكی تایبەت قەمەرە جۆری (ئۆپڵ) كەسێك گیانی لەدەستدا.

ڕاشیگەیاندووە، ئەو كەسەی كە لە ڕووداوەكەدا گیانی لەدەستداوە هیچ ناسنامەیەكی پێ نیە و شۆفێری ئۆتۆمبێلی ئۆپڵەكەیە و كەسەكەش ڕەنگ گەنم و تەمەنی لەنێوان ٢٥ بۆ ٣٠ ساڵ دەبێت و كابۆیەكی ڕەش و كڕاسێكی سپی لەبەردایە.

ئاماژەی بەوەشكردووە، تەرمەكەی ئێستا لە پزیشكی دادوەری ڕانیەیە، داوا لەكەسوكاری دەكەین سەردانی پزیشكی دادوەری ڕانیە بكەن بۆ وەرگرتنەوەی تەرمەكەی.