سەردێر

خاكی هەرێم بووەتە مەیدانی جەنگی دراوسێكان

دوای شەڕی توركیا و پەكەكە، نۆرەی شەڕی پاسداران و دیموكراتەكانە

خەڵك-بەشی هەواڵ

 

ناوە ناوە كۆماری ئیسلامی ئێران فشار و هێرشەكانی بۆسەر حزبەكانی ڕۆژهەڵاتی كوردستان لە هەرێمی كوردستان ئەنجام دەدات و زۆرجارانیش زیانی گیانی و ماڵی بەدوای خۆیدا دەهێنێت، لە نوێترین هەڕەشەدا، فەرماندەی زەمینی سوپای پاسدارانی ئێران هۆشاری دایە بەرپرسانی هەرێم و هاوكات داواشی لە دانیشوتوانی هەرێمی كوردستان كرد خۆیان بە دوور بگرن لە بنكە و بارەگاكانی حزبەكانی ڕۆژهەڵات.

 

مێژووی فشار و هەڕەشەكانی ئێران

دەیان ساڵە كۆماری ئیسلامی ئێران فشار و هەڕەشەكان بۆسەر حزبەكانی ڕۆژهەڵات بەردەوامە و هەندێك جاریش هەڕەشەكانی كردووە بە كردەیی و هێزی سەربازی بەكارهێناوە، هاوكات بەشێكیتر لە فشارەكانیشی لە ڕۆژهەڵاتی كوردستان ئەنجام دەدات بە دەستگیركردنی چالاكانی سیاسی یاخود ئەو كەسانەی كە لە حزبەكانی ڕۆژهەڵاتەوە نزیكن.

حەسەن كاكیلی بەرپرسی سیاسی هێزی پارێزگاری حزبی دیموكراتی كوردستان بە (خەڵك)ی ڕاگەیاند، ئێمە لە هەڕەشەكانی ئێران ناترسین، چونكە ئەو وڵاتە لە مێژە هەڕەشە دەكات بۆ ئەوی خەباتی چەكداری واز لێبهێنین، بەڵام ئێمە بەردەوامین.

 

هۆكاری فشارەكانی ئێران لەسەر حزبەكانی ڕۆژهەڵات

جگە لەوەی كە وەك حزبی ئۆپۆزسیۆنی ئێرانی ناسراون و بە بەردەوامی دژایەتی خۆیان بۆ كۆماری ئیسلامی ئێران ڕاگەیاندووە، هۆكارێكی دیكەی فشارەكان گوێڕایەڵی بەشێك لە دانیشتوانی ڕۆژهەڵاتی كوردستانە بۆ لایەنەكانی ڕۆژهەڵات بەتایبەت لە بابەتی بایكۆتی هەڵبژاردنەكان، یاخود هەر بابەتێكی پەیوەست بە دۆخێكی تایبەت، بەشێوەیەك حزبەكانی داوای هەڵوێست لە هاووڵاتیان دەكەن و ئەوانیش بە ئەنجادانی هەڵوێستەكە دژایەتی خۆیان بۆ حكومەتی ئێران دوپاتدەكەنەوە، ئەمە جگە لە ڕۆژهەڵات ناوچەكانی دیكەی ئێرانیش دەگرێتەوە، بەشێوەیەك بەرپرسی پەیوەندییەكانی كۆمەڵەی زەحمەتكێشانی كوردستان ڕایدەگەیەنێت، پشتگیریی خۆپیشاندانەكانی باشووری ئێرانمان كردووە.

عەتا سەقزی بەرپرسی پەیوەندییەكانی كۆمەڵەی زەحمەتكێشانی كوردستان بە (خەڵك)ی ڕاگەیاند، ئەوكاتەی خۆپیشاندانەكانی شارەكانی باشووری ئێران دەستیپێكرد، وەكو ناوەندی هاوكاری و هەم وەكو كۆمەڵەش پشتیوانیمان لەو خۆپیشاندانانە كردووە.
وتیشی”چونكە خۆپیشاندەران داوای مافی خۆیان كردووە و هێزكانی ئێرانیش بە چەك وەڵامیان دەدەنەوە”.

 

ئێران جوڵەی بە هێزی زەمينی كردووە لە ڕۆژهەڵات؟

بەپێی زانیارییەكان، ئێران هێزێكی زۆری زەمینی لە ناوچەی شنۆ و نەغەدەی ڕۆژهەڵاتی كوردستان كۆكردووەتەوە بە ئامانجی هێرش بۆسەر حزبەكانی ڕۆژهەڵات لە هەرێمی كوردستان، ئەمەش دوای ئەوەی لە چەند ڕۆژی ڕابردوودا چەندین جار سنورەكانی نێوان هەرێم و ڕۆژهەڵاتی كوردستانی بۆردومان كردووە.


حەسەن كاكیلی بەرپرسی سیاسی هێزی پارێزگاری حزبی دیموكراتی كوردستان ئاشكرایكرد، ئاگادارین لەوەی كە هێزی هێناوە، بەڵام نازانین ئەوان هێرشی زەمینی دەكەن، یان نا.
ئاشكراشیكرد، ئەو تۆبارانەی كە دەكرێت لە ناوچەی شنۆوەیە و لەوێوە بۆردومان دەكات و هاوكات بە فڕۆكەی بێ فڕۆكەوانیش هێرشی كردووە.
جەختیشیكردەوە، ئێمە پێشتر ئاگادار بووین و پێش ئەوەی بۆردومان دەستپێبكات، بارەگاكانمان چۆڵ كردووە و هیچ زیانێكی گیان نەبووە، بەڵام هەندێك پوش و لەوەڕگەی جوتیاران سووتاوە.

دەشڵێت: ئێران لە هەموولایەكەوە ئامانجی ئەوەیە هێرش بكات ئەگەر بۆی بكرێت هەوڵ دەدات هێرش بكات، بەڵام نازانین بە زەمینی هێرش دەكات یان ئاسمانی، چونكە بۆ ئێران زۆری تێدەچێت و چەند سەد كیلۆمەترێك هێرش بكات و تێچووی زۆری دەوێت و ئەویش لەو دۆخەیدا نییە ئەو هێرشانە دەستپێبكات بەهۆی كێشەی نێوخۆیی و ئابوورییەوە.

 

ئێران بە ڕێكەوتن هێرش دەكات یان سەربەخۆ؟

هەرچەندە سوپای توركیا بە دەیان كیلۆمەتر هاتووەتە نێو خاكی هەرێمی كوردستان و هاوكات ناوە ناوەش هێرشەكانی بۆسەر پەكەكە و بەشێك لە گوندە سنوورییەكان بە بیانووی بوونی پەكەكە ئەنجام دەدات و تاكو ئێستاش بە سەدان هاووڵاتی سڤیل كوژراون و بە دەیان گوندیش چۆڵ كراون، بەڵام حكومەتەكانی هەرێم و عێراق هیچ هەڵوێستێكی كردەییان نییە و ئەمەش گومانی ئەوەی لێدەكرێت كە ڕێكەوتنێكی نهێنی لەنێوان هەر سێ لادا هەبێت بۆ ئەو مەبەستە، پرسیارەكە ئەوەیە ئایا ئێران ڕێكەوتنی لەگەڵ هەرێم و عێراق هەیە بۆ بۆردومانكردنی حزبەكانی ڕۆژهەڵات و ناوچە سنوورییەكانی هەرێم؟


حەسەن كاكیلی ڕایگەیاند، ئەگەر ئێران هێرش بكات، لەسەری دەشكێتەوە، پێمان وایە ئەو جۆرە ڕێكەوتنە نییە، چونكە ئێمە ئەو سەرئێشەیەمان بۆ حكومەتی عێراق و هەرێم دروست نەكردووە كە هێرش بكەین و لە ئێران ئۆپەراسیۆن بكەین و بگەڕێینەوە.
وتیشی”ڕاستە پێشمەرگەمان لە سنوورەكان هەیە، بەڵام لانی كەم 50 كیلۆمەتر لە سنورەكانی ئێرانەوە دوورن، ئێمە نەمانهێشتووە هیچ سەرئێشەیەك بۆ حكومەتی هەرێم دروست بكەین و پاراستومانە و بە كاری خۆشمانی دەزانین حكومەت هەرێم بپارێزێن”.

 

ئێران دەتوانێت هێرشی زەمینی لە هەرێم ئەنجام بدات؟

هەرچەندە دەیان جار هێرشی ئاسمانی ئەنجامداوە، بەڵام بوونی ئەمریكا لە هەرێم ڕێگری دەكات لە هێرشە زەمنییەكانی ئێران بۆسەر حزبەكانی ڕۆژهەڵات، مەگەر ئەوەی ڕێكەوتنێك بوونی هەبێت و هەموو ئەگەرێكیش بۆ بەڕێوەبردنی سیاسەت لە ئارادایە.


كاكیلی جەختیشیكردەوە، جاشێك لە هەر شوێنێك كوژرا، ئێران بەهانە دەهێنێتەوە بۆ هێرش بۆسەر ئێمە، لە ڕۆژهەڵات پێشمەرگە و ڕێكخستنی نهێنی لێیە و زۆربەی كارەكانمان خەڵكی ڕۆژهەڵات دەیكات، ئێران هیچ بەهانەیەكی نییە هێرش بكات، ئەوەی دەیكات شتێكی یاسایی نییە ئەگەر هێرش بكات لەسەری دەكەوێت، هەموو ئەگەرێكیش هەیە، چونكە ئەمریكا ئەفغانستانی جێهێشتووە، دیارە ڕێكەوتن هەیە ئەو كەسانەی چالاكی سیاسین و بۆیان ڕوون بووەتەوە ئەفغانستان چۆن بووە، تاكو ئەمریكا ڕازی نەبووبێت تالیبان نەدەیتوانی بچێتە ئەفغانستان، 20 ساڵە لەوێیە، بەڵام تاكو ئەمریكا ئێرە چۆڵ نەكات پێموانییە ئێران بتوانێت هێرشی زەمینی بكاتە سەر هەرێم.

 

بۆچی ئێران چەند حزبێكی ڕۆژهەڵات بە ئامانج دەگرێت؟

 

هەرچەندە چەندین حزب لە ڕۆژهەڵاتی كوردستان بوونیان هەیە، بەڵام ئێران چەند دانەیەكیانی بە ئامانج گرتووە و نایەوێت جموجوڵی ئەو حزبانە تەشەنە بسێنێت و بەردەوام لە هەوڵی لێدانیاندایە.

حەسەن كاكیلی ڕایگەیاند، ئەگەر ئێران لە حزبەكانی ڕۆژهەڵات بدات لە هەموومان دەدات، بەڵام موشەكبارانەكە زیاتر لە ئێمەیدا و زیاتر لە 40 كەسیمان شەهید بوون و دروست لەو شوێنەیدا كە كۆبوونەوەی سەركردایەتی لێبوو.
وتیشی”دیموكراتەكان بە هەردوولاوە لەبەر ئەوەی خەڵكی زۆریان هەیە لە ڕۆژهەڵات و پشتیوانیان لێدەكەن، زۆر دوژمنایەتی لەگەڵ دیموكراتەكانە”.