سەردێر

هاوپەیمانان لەسەر هێرشەكەی هەولێر ڕوونكردنەوە دەدەن

خەڵك-

وتەبێژی هێزەكانی هاوپەیمانیی نێودەوڵەتیی دژی داعش ڕایدەگەیەنێت، هێرشەكەی شەوی ڕابردووی سەر فڕۆكەخانەی هەولێر بە دوو فڕۆكەی بێفڕۆكەوان ئەنجامدراوە.

وەین مارۆتۆ وتەبێژی هێزەكانی هاوپەیمانیی نێودەوڵەتیی دژبە داعش لە تویتێكدا لە هەژماری خۆی ئاماژە بۆ ئەوە دەكات، هێرشەكەی سەر فڕۆكەخانەی هەولێر لە ڕێگەی دوو فڕۆكەی بێفڕۆكەوانەوە بووە و هیچ زیانێكی گیانی و ماددی نەبووە.

وتیشی”یەكێك لە فڕۆكە تێكشكێندراوەكان كەوتە نێو سنووری بنكەی هاوپەیمانیی نێودەوڵەتی و فڕۆكەكەی دیكەش كەوتە دەرەوەی سنووری بنكەكەوە و هێرشەكان هیچ زیانێكی گیانی و ماددییان لێنەكەوتوەتەوە”.

ئاشكراشیكرد، هەر هێرشێك كە دەكرێتەسەر حكومەتی عێراق، هەرێمی كوردستان و هاوپەیمانان، دەسەڵاتی دامەزراوە عێراقییەكان، “سەروەریی یاسا و سەروەریی نیشتمانیی عێراق لەناودەبات”.

جەختی لەوەش كردەوە، ئەو هێرشانە ژیانی خەڵكی مەدەنی، هێزە هاوبەشەكانمان لە سوپای عێراق، هێزەكانی پێشمەرگە و هاوپەیمانان دەخەنە مەترسییەوە.

شەوی ڕابردوو هێزەكانی هاوپەیمانان لە فڕۆكەخانەی نێودەوڵەتیی هەولێر بە دوو فڕۆكەی بێفڕۆكەوان كرایە ئامانج.