سەردێر

بەرێوەبەری پەروەردەی شارباژێڕ؛ وه‌ک پێویست ئاوڕ له‌په‌رورده‌ی ده‌ره‌وه‌ی شاره‌کان نادرێته‌وه‌

ساڵی پار نه‌مانتوانی سوود له‌ خوێندنی ئه‌لیکترۆنی وەربگرین وه‌ک پێویست، بۆ سیستمی ئی په‌روه‌رده‌ش کێشه‌مان هه‌یه‌

خەڵک

دەستپێکردنەوەی خوێندن و مەترسییەکانی کۆرۆنا و وەرگرتنی ڤاکسین لە لایەن مامۆستایان، دابینی پێداویستییەکانی خوێندن و کەمی ژمارەی مامۆستا و کێشەی مامۆستایانی وانەبێژ و گرفتەکانی پەروەردەی شارباژێڕ، تەوەری پرس و رای دایدارێکی تایبەتی تۆڕی میدیایی خەڵکە، لەگەڵ لەتیف حسێن، بەرێوەبەری پەروەردەی شارباژێڕ.

ناوبراو دەڵێت؛ بایه‌خی حکومه‌ت و حزب هه‌مووی بۆ سه‌نته‌ری شاره‌کانه‌، به‌داخه‌وه‌ وه‌ک پێویست ئاوڕ له‌په‌رورده‌ی ده‌ره‌وه‌ی شاره‌کان نادرێته‌وه‌، دەشڵێت، پێویسته‌ مامۆستایانی به‌ڕێز خۆیان به‌ ڤاکسین بکوتن چونکه‌ به‌داخه‌وه‌ هێشتا رێژه‌ی کوتان له‌ناو مامۆستایان که‌مه‌، باس لەوەش دەکات، لە شارباژێڕ هه‌ندێ ناوچه‌ هه‌یه‌ نه‌ک ئینته‌رنێت به‌ڵکو شه‌به‌که‌ی مۆبایلیشی نیه‌و ساڵی پار نه‌یانتوانیوە سوود له‌ خوێندنی ئه‌لیکترۆنی وەربگرین وه‌ک پێویست.

خەڵک – دەزانن کە کۆرۆنا هێشتا هەر مەترسییەو لەناو ناواندایە، هەڵسەنگاندنی تەواو کراوە تا بێ مەترسی، ئەمساڵ جیا لە ساڵانی ڕابردوو پرۆسەی خوێندن دەستپیبکاتەوە؟

لەتیف حسێن ؛ بێگومان هێشتا مه‌ترسی کۆرۆنا له‌سه‌ر ته‌ندروستی هه‌موو لایه‌ک ماوه‌، به‌ڵام به‌ بڕوای من ئه‌م مه‌ترسییه‌ وه‌ک پێشتر نابێت و خۆشبه‌ختانه‌ ئێستا ڤاکسین به‌رده‌سته‌و ده‌توانێت مه‌ترسییه‌که‌ که‌م بکاته‌وه‌و خه‌ڵکیش به‌ گشتی هۆشیاریی خۆپارێزی هه‌یه‌، بڕیاری کردنه‌وه‌ی ده‌رگای قوتابخانه‌کان بۆ ئه‌مساڵ به‌ به‌رنامه‌ کراوه‌و پلانی بۆ دانراوه‌، ئه‌گه‌ر شتی نه‌خوازراو ڕوو نه‌دات وه‌ک خۆی جێبه‌جێده‌کرێت، ئه‌وه‌ی گرنگه‌ بۆ ئێستا ئه‌وه‌یه‌ که‌ پێویسته‌ مامۆستایانی به‌ڕێز خۆیان به‌ ڤاکسین بکوتن چونکه‌ به‌داخه‌وه‌ هێشتا رێژه‌ی کوتان له‌ناو مامۆستایان که‌مه‌، ئه‌مه‌ش بۆ ئه‌وه‌یه‌ که‌ مه‌ترسی زیاتر دووربخرێته‌وه‌، بۆیه‌ ده‌توانم بڵێم ئه‌مساڵ جیاوازتر ده‌ست پێده‌که‌ینه‌وه‌و ته‌مه‌ننا ده‌که‌م بتوانین به‌پێی ئه‌و به‌رنامه‌یه‌ی ئێستا دانراوه‌ خوێندنی ئه‌مساڵ بێ گرفت به‌ڕێوه‌ بچێت.

خەڵک – هیچ ڕێوشوێنێکی تایبەتان دیاریکردووە بۆ خوێندنی ناو پۆل لە سنووری بەڕێوەبەرایەتییەکەتان تا کۆرۆنا زەفەر بە خوێندکاران و مامۆستایان نەبات و خوێندنێکی بەردەوام دەستپێبکەن؟

لەتیف حسێن ؛  به‌و پێیه‌ی له‌ ده‌ره‌وه‌ی شاره‌کان ئه‌و قه‌ره‌باڵغییه‌ی ناو پۆله‌کان نییه‌ به‌ به‌راورد به‌سه‌نته‌ری شاره‌کان، ده‌توانین ئاسانتر به‌رنامه‌کانمان جێبه‌جێ بکه‌ین بۆ خوێندنی ناو پۆل، به‌ڵام له‌گه‌ڵیشیدا ئاماده‌کاریمان کردووه‌و ده‌ستمان به‌ بڵاوکردنه‌وه‌ی هۆشیاریی کردووه‌و به‌رده‌وام رێنمایی به‌ مامۆستاو خوێندکار ده‌ده‌ین و چاودێری دۆخه‌که‌ش ده‌که‌ین، به‌ به‌رنامه‌ی تایبه‌تی خۆمان ئاماده‌کاریمان بۆ ده‌ستپێکردنی ساڵی نوێی خوێندن کردووه‌.

خەڵک – بۆ دەستپێکردنەوەی خوێندن، پێداویستییەکانی خوێندنتان بەردەستە، لە ڕووی کتێب و پێویستی و هۆیەکانی دیکەی خوێندن؟

لەتیف حسێن ؛ سه‌باره‌ت به‌ پێداویستییه‌کان، به‌داخه‌وه‌ وه‌ک پێویست نییه‌و هێشتا نه‌مانتوانیوه‌ له‌مباره‌یه‌وه‌ ئه‌و کێشانه‌ چاره‌سه‌ر بکه‌ین، به‌ڵام بۆ ئه‌مساڵ کتێبی نوێمان به‌ده‌ست گه‌یشتووه‌، ئه‌گه‌رچی هه‌ندێ وانه‌ هه‌یه‌ به‌ده‌ستمان نه‌گه‌یشتووه‌، هیوادارین به‌ زووترین کات ئه‌وانی تریش بگه‌ن، پێداویستییه‌کانی تریش له‌ڕێگه‌ی دڵسۆزانی په‌روه‌رده‌وه‌ بتوانین سه‌رجه‌میان دابین بکه‌ین، وه‌زاره‌تی په‌رورده‌ش بتوانێت له‌ڕێی حکومه‌ته‌وه‌ هه‌وڵی خۆی بۆ دابینکردنی پێداویستی قوتابخانه‌کان بدات.

خەڵک – دەزانن کە بەشێکی زۆری ناوچەی شارباژێر خزمەتگوزاری ئینتەرنێتی نییە، لەئەگەری خوێندن بە شێوەی ئەلیکترۆنی، چۆن ڕووبوڕووی هەر پێشهاتێک دەبنەوە؟

لەتیف حسێن ؛ بێگومان هه‌ندێ ناوچه‌مان هه‌یه‌ نه‌ک ئینته‌رنێت به‌ڵکو شه‌به‌که‌ی مۆبایلیشی نیه‌و ساڵی پاریش نه‌مانتوانی سوود له‌ خوێندنی ئه‌لیکترۆنی وەربگرین وه‌ک پێویست، به‌ڵام توانیمان به‌به‌رنامه‌ی تایبه‌ت خۆمان وه‌ک به‌دیل هه‌وڵی تر بده‌ین و بۆ ئه‌مساڵیش هه‌ر هه‌مان کێشه‌مان هه‌یه‌، نه‌ک بۆ خوێندنی ئه‌لیکترۆنی به‌ته‌نها، به‌ڵکو بۆ سیستمی ئی په‌روه‌رده‌ش کێشه‌مان هه‌یه‌و داوامان کردووه‌ بۆمان چاره‌سه‌ر بکه‌ن.

خەڵک – سنووری بەرێوەبەرایەتیتان، قوتابخانەی پێویستی بۆ هەموو ئاستەکانی خوێندن تێدا دەستەبەرە؟ تا چەند پێویست بە هەبوون و دروستکردنی یان نۆژەنکردنەوەی خوێندنگە و قوتابخانەکان هەیە؟

لەتیف حسێن ؛  ئێمه‌ کێشه‌ی بینای قوتابخانه‌مان زۆره‌، به‌هۆی قه‌یرانی دارایی پڕۆژه‌کان وه‌ستێنران، ئێمه‌ش چه‌ندین قوتابخانه‌مان ته‌واو نه‌کراون، چه‌ندین قوتابخانه‌مان نۆژه‌نکردنه‌وه‌یان ده‌وێ و هه‌ندێکیش مه‌ترسی رووخانیان له‌سه‌ره‌، هه‌موو ئه‌مانه‌مان کردۆته‌ یاداشت و به‌ لایه‌نی په‌یوه‌ندیدار دراوه‌، به‌ هیواین زوو ئاوڕی لێ بده‌نه‌وه‌و ته‌نها کار بۆ سه‌نته‌ری شاره‌کان نه‌کرێت.

خەڵک – حکومەت و وەزارەتی پەروەردە تاچەند هاوکارن بۆ دابینی پێداویستییەکانتان بەراورد بە پەروەردەی شارەکان؟ لە ڕووی میلاکات و ژمارەی مامۆستا و فەرمانبەر ژمارەی پێویستان هەیە؟

لەتیف حسێن ؛ به‌بڕوای من تا ئێستا بایه‌خی حکومه‌ت و حزب هه‌مووی بۆ سه‌نته‌ری شاره‌کانه‌، به‌داخه‌وه‌ وه‌ک پێویست ئاوڕ له‌په‌رورده‌ی ده‌ره‌وه‌ی شاره‌کان نادرێته‌وه‌، کێشه‌ی زۆری تێدایه‌، به‌تایبه‌ت میلاکات و زۆر کێشه‌ی تر، ئێستا مامۆستا بۆ شار ده‌گوزارێته‌وه‌ به‌ڵام ده‌ره‌وه‌ی شاره‌کان بێ مامۆستا ده‌بن، ناو شار پڕ ده‌کرێت له‌مامۆستای زیاده‌و ده‌ره‌وه‌ش بێ مامۆستا ده‌کرێت، له‌کاتێکدا ئێمه‌ چه‌ندین پێشنیارمان پێداون کاری له‌سه‌ر نه‌کرا، کێشه‌ی مامۆستایانی وانه‌بێژ، که‌ بوونه‌ته‌ کۆڵه‌که‌ی په‌روه‌رده‌ی ده‌ره‌وه‌ی شاره‌کان، وه‌ک پێویست مافیان نه‌دراوه‌و وه‌ک ناوشار مامه‌ڵه‌یان له‌گه‌ڵ ده‌کرێت، بۆیه‌ من نایشارمه‌وه‌ له‌ڕێگه‌ی یاداشتیشه‌وه‌ مه‌ترسی گه‌وره‌ی سه‌ر په‌روه‌رده‌ی ده‌ره‌وه‌ی شاره‌کانم گه‌یاندووه‌و وابڕوات ئه‌م کێشانه‌ گه‌وره‌تر ده‌بن، به‌هیوام زوو به‌ده‌م چاره‌سه‌رکردنیه‌وه‌ بچن.

خەڵک – سەبارەت بە قەرەبووی وانەکانی ساڵی ڕابردوو چ پلانێکتان هەیە، دەزانن کە کۆرۆنا نەیهێشت وەک پێویست وانەکان بخوێنرێن؟

لەتیف حسێن ؛ بابه‌تی قه‌ره‌بوو، وه‌زاره‌تی په‌روه‌رده‌ له‌ڕێی به‌رنامه‌ی تایبه‌ته‌وه‌ پلانی بۆ ئه‌وه‌ داناوه‌و ئێمه‌ش جێ به‌جێی ده‌که‌ین و سه‌ره‌تای ده‌ستپێکی ساڵی نوێی خوێندن، به‌شه‌ وانه‌ی قه‌ره‌بوو دانراوه‌و کاری له‌سه‌ر ده‌که‌ین بۆ ئه‌وه‌ی بتوانین لانیکه‌م نه‌هێڵین زیانه‌کان له‌مباره‌یه‌وه‌ زیاتر بکه‌ین.

خەڵک – گەشبینن بەوەی کە لایەنی پەیوەندیدار ئاوڕی جددی لە کێشەو گرفتەکانتان بداتەوە؟

لەتیف حسێن ؛  به‌و ئومێده‌م وه‌زاره‌تی په‌رورده‌و حکومه‌تی هه‌رێم ئاوڕی جدیی له‌و کێشانه‌ بداته‌وه‌ که‌ له‌ناو که‌رتی په‌روه‌رده‌دا هه‌یه‌، به‌تایبه‌ت ده‌ره‌وه‌ی شاره‌کان، کێشه‌ی میلاکات و مامۆستایانی ماندووی وانه‌بێژ چاره‌ بکات، بتوانێت له‌رێگه‌ی به‌رنامه‌ی جیاوازه‌وه‌ ئه‌م کێشانه‌ چاره‌سه‌ر بکات، ناکرێت هه‌موو به‌رنامه‌کان بۆ ناو شار بێت و ده‌ره‌وه‌ی شاره‌کان بێ به‌ش ببن.