سەردێر

شێواز و ڕۆژەكانی دەوامی زانكۆ و پەیمانگاكان دیاریكرا

خەڵك-
لیژنەی باڵای تەندروستی و سەلامەتی نیشتمانی بۆ ڕووبەڕووبوونەوەی كۆرۆنا لە عێراق وردەكاری شێواز و ڕۆژەكانی دەوامی لە زانكۆ و پەیمانگا حكومی و ئەهلییەكان ڕاگەیاند و جەختیشی لە دەوامی ناو كامپس كردەوە.

ئەمیندارێتی گشتی ئەنجوومەنی وەزیرانی عێراق لە ڕاگەیەنراوێكدا دەقی بڕیارەكانی لیژنەی باڵای تەندروستی و سەلامەتی نیشتمانی بۆ ڕووبەڕووبوونەوەی كۆرۆنای بڵاوكردەوە و ئاماژەی بەوەكردووە، بۆ ساڵی نوێی خوێندنی 2021- 2022 لە زانكۆ و پەیمانگا حكومی و ئەهلییەكان بەشێوەی ئامادەیی ناو كامپس دەبێت بە مەرجێك خوێندكار و مامۆستا و فەرمانبەران كارتی وەرگرتنی ڤاكسینیان پێ‌ بێت یان هەفتانە پشكنینی (PCR) بكەن و ئەنجامەكەی نەرێنی بێت.

وەك لە بڕیارەكەدا هاتووە، شیواز و ڕۆژانی دەوام بەم جۆرە دەبێت:
1- كۆلێژە پزیشكییەكان و تەندروستی و پزیشكی ڤێتێرنەری (قۆناغی كۆتایی) دەوامیان بەتەواوی بەشێوەی ئامادەیی ناو كامپس دەبێت.
2- كۆلێژە پزیشكی و تەندروستی و پزیشكی ڤێنێرنەری (قۆناغە ناكۆتاییەكان) دەوامیان بەشێوەی ئامادجەیی دەبێت و هەفتانە 3 ڕۆژ دەوام دەكەن.
3- كۆلێژەكانی تایبەت بە ئەندازیاری و زانستی و سەرجەم قۆناغەكانیان بەشێوەی ئامادەیی دەوام دەكەن هەفتانە دوو بۆ سێ‌ ڕۆژ ئەوەش بەپێی دۆخی بڵاوبوونەوەی كۆرۆنا دەگۆڕێت و لەلایەن ئەنجوومەنی كۆلێژ و بەشەكانەوە بڕیاری لێ‌ دەدرێت.
4- ئەو كۆلێژانەی تایبەتمەندییان مرۆییە، سەرجەم قۆناغەكانیان دەوام بەشێوەی ئامادەیی ناو كامپس دەكەن لە هەفتەیەكدا دوو ڕۆژ و ماددە خوێندراوەكان لەناو كامپس لەلایەن ئەنجوومەنی كۆلێژ و بەشەكانەوە دیاری دەكرێت.
5- تاقیكردنەوەكانی وەرزی و كۆتایی بۆ وانە بنچینەیی و زانستییەكان بەشێوەی ئامادەیی دەبێت، هەروەها بۆ خوێندنی باڵای (دكتۆرا و ماستەر)یش بەهەمان شێوەیە.

لیژنەی باڵای كۆرۆنا بڕیاریشی داوە، “وانە لاوەكییەكان دەكرێت بەشێوەی ئەلیكترۆنی بخوێنرێن و دەسەڵات دەدرێت بە ئەنجوومەنی زانكۆكان تا ڕۆژێك دەوام زیادە بكەن بۆ خوێندكاران ئەگەر دۆخی كۆرۆنا لەباربوو، هەروەها دەسەڵاتی ئەوەشیان پێ‌ دەدرێت ڕۆژانی شەممە بە ئامادەیی دەوام بكرێت تاوەكو ڕۆژەكان و خشتەی وانەكان بگونجێرێن”.

ئەمە لەكاتێكدایە، كە وەزارەتی خوێندنی باڵای هەرێم دەستپێكردنەوەی دەوامی لە سەرجەم زانكۆ و پەیمانگاكان ڕاگەیاندووە بەشێوەی ئامادەیی ناو كامپس و بەپێی ڕۆژمێری زانكۆیی.