سەردێر

پسپۆڕێكی تۆپی پێ‌ باس لە دۆڕاندنەكەی عیراق دەكات بە ئێران

خەڵك-
سەفوان عەبدولغەنی، پسپۆڕ لە تۆپی پێ‌ پێیوایە، دۆڕاندن لە یارییەكەی ئێراندا لە پاڵاوتنی یەكلاكەرەوەی مۆندیال، ڕەنگە خۆی لەخۆیدا ئەو كێشەیە نەبێت، هێندەی ئەوەی هەڵبژاردەی عیراق بە ئاستێكی لاوازەوە دەركەوت كە مەترسی ئەوە لەنێوەندە وەرزشییەكاندا دروست ندەكات، نەتوانرێت كاروانی بەرەو مۆندیال تەواو بكات.

عەبدولغەنی لە لێدوانێكیدا بۆ ئاژانسی فەرمی عیراقیە ڕایگەیاند”دۆڕان بەرامبەر بە هەڵبژاردەی ئێران ڕەنگە خۆی لەخۆیدا كێشە نەبێت، هێندەی ئەو شۆكەی دروستبوو بەرامبەر بە ئاستی لاوازی هەڵبژاردەی نیشتمانی لەڕووی جەستەیی و سایكۆلۆجی و تەكنكییەوە، ئەمەش مەترسی ئەوە دێنێتە كایە كە نەتوانێت، كاروانی سەركەوتن بەرەو مۆندیال تەواو بكات”.

بە وتەی عەبدولغەنی”ڕاهێنەر بەشێك لە بەرپرسیارێتی دەكەوێتە ئەستۆ، بەهۆی گۆڕینی سیستمی یاریی و شێوازیی مامەڵەكەكردن لەگەڵ هەڵبژاردەی بەرامبەر، دۆڕاندیش لە هەر یارییەكدا ئەگەرێكی كراوەیە، بەڵام بەرزی و نزمی ئاستی یاریزانان، نیشانەی سەرسوڕمان سەبارەت بە ئایندەی تۆپی پێ‌ لە عیراقدا دروست دەكات”.

لە كۆتاییدا، عەبدولغەنی ڕایگەیاند”پاڵاوتنەكان هێشتا لە سەرەتادان، هەلی قەرەبووكردنەوەی دۆڕاندنەكە هەیە، گەر پێداچوونەوە بە خاڵە لاوازەكاندا بكرێت و كێشەی تیپەكە دیاریی بكرێت، تا یارییەكانی ئایندەی لە ئاستی ناوبانگی تۆپی پێی عیراقیدا بێت”.

شەوى ڕابردوو، هەڵبژاردەی عیراق لە دووەم یاریی لە چوارچێوەی پاڵاوتنی یەكلاكەرەوە بۆ سەركەوتن بۆ جامی جیهانی 2022، بە ئەنجام 3-0 بەرامبەر بە هەڵبژاردەی ئێران دۆڕا.