سەردێر

ئاسایشی هەولێر: تاوانبارێكمان كوشت كە 7 فەرمانی دەستگیركردنی هەبووە

خەڵك

بەڕێوەبەرایەتیی ئاسایشی هەولێر ڕایدەگەیەنێت، كەسێكیان كوشتووە كە حەوت فەرمانی دەستگیركردنی هەیە بە ماددەكانی “تیرۆر، هەڕەشەكردن و كوشتن”.
بەڕێوەبەرایەتی ئاسایشی هەولێر لە ڕاگەیەنراوێكدا ڕایگەیاند، ئەو كەسە ئێوارەی ئەمڕۆ ڕێككەوتی 5ی ئەیلوولی 2021 لەناو شاری هەولێر لە گەڕەكی مەهاباد هێزەكانیان هەوڵی دەستگیركردنیان داوە، “بەڵام تاوانبار بۆ جارێكی تر بە چەك و تەقەكردن ڕووبەڕووی هێزەكانمان بووەوە و دوو كارمەندی تری برینداركرد و دواتر تاوانباریش لەو ڕووبەڕووبوونەوەیەدا كوژراوە”.

ئاسایشی هەولێر ڕوونیشی دەكاتەوە و دەڵێت، ئەو كەسە ناوی “ئەحمەد حەمەدەمین ڕەسوڵ”ە، دانیشتووی شاری هەولێرە و داواكراوە لە دادگا بە ماددەی 406. ئاماژە بەوەش كراوە، لە ڕێككەوتی 23ی ئایاری 2021 “مەفرەزەكانمان لە هەوڵی دەستگیركردنی بوون، داواكراو تەقەی لێكردوون و دوو كارمەند و هاووڵاتییەكی ئافرەت بە ناوی (ش. و. ر)ی برینداركردوون و تاوانباریش توانیی ڕابكات”.

ئاسایشی هەولێر ئاماژە بەوەش دەكات، “دواتریش ئەو كەسە بەردەوام هەڕەشەی لە هاووڵاتییان دەكرد و مەترسی بوو لەسەر گیانی هاووڵاتییان، لە ڕێككەوتی 18ی حوزەیرانی 2021 هەستا بە كوشتنی هاووڵاتی، فەرهاد جەبار محەمەد و خۆی لە شوێنێكی نادیار حەشاردا”.

بە پێی ڕاگەیەنراوەكەی بەڕێوەبەرایەتی ئاسایشی هەولێر، ئەو كەسە حەوت فەرمانی دەستگیركردنی بە ماددەكانی “تیرۆر، هەڕەشە و كوشتن” هەبووە، بۆیە ئاسایشی هەولێر لێكۆڵینەوە و بەدواداچوونی كرد و لە ئەنجامدا توانیویەتی “شوێنی تاوانبار دەستنیشان بكات” و ئەمڕۆ كوژراوە.

بەڕێوەبەرایەتی ئاسایشی هەولێر دەڵێت، هاووڵاتییان دڵنیا دەكەنەوە كەوا “هێزەكانمان هەمیشە لە ئامادەباشیدان بۆ پاراستنی گیان و ماڵیان، هەر كەسێكی دەرچوو لە یاسا ڕووبەڕووی هێزە یاساپارێزەكان ڕابوەستێت، ئەوا بە توندترین شێوە بەرپەرچی دەدرێتەوە”.