سەردێر

یەكەم بنكەی كوتانی ڤاكسین بۆ هێزەكانی پێشمەرگە كرایەوە

خەڵك
بەڕێوەبەرایەتی كاروباری تەندروستی وەزارەتی پێشمەرگە ڕایدەگەیەنێت ، ڤاكسین بۆ هەموو پێشمەرگە دابین دەكات و نەخۆشخانەی پێشمەرگە لە هەولێر دەكرێتە بنكەیەكی پێكوتەی ڤاكسینی كۆڕۆنا بۆ هێزەكانی پێشمەرگە.

د. رزگار عەلی، بەڕێوەبەری كاروباری تەندروستی وەزارەتی پێشمەرگە ئەمرۆ ٣٠ی ئابی ٢٠٢١ لە لێدوانێكی ڕۆژنامەوانیدا ڕاگەیاندووە، لەئەنجامی ئەو هەوڵ و كۆششانەی دران توانرا نەخۆشخانەی پێشمەرگە لە هەولێر ببێتە بنكەیەكی پێدانی ڤاكسین و بەشە ڤاكسینی تەواو بۆ پێشمەرگە دابین بكرێت.

وتیشی،”لە ئەمڕۆ بەدواوە، دەتوانین ڕۆژانە ڤاكسینی دژە كۆڕۆنا دابین بكەین بۆ پێشمەرگە، لە هەر سێ جۆری ڤاكسینەكان، كە لە سەر ئاستی دونیا بەكاردێت و بۆیە بۆ ئەو مەبەستەش داوامانكردووە هەر بەڕێوەبەراتیەك لیستی خۆیان ئامادە بكەن و بنێرن بۆ بەڕێوەبەرایەتی كاروباری پزیشكی تا رۆژ و كاتیان بۆ دیاری بكرێت”.

ڕاشیگەیاندووە، لەداهاتوویەكی نزیكدا ئاگاداری یەكە سەربازیەكانی دیكە دەكەینەوە، هەموو پێشمەرگەیەك سەر بە هەر یەكەیەكی سەربازی بێت دەتوانێ سەردانمان بكات، بۆ وەرگرتنی ڤاكسین، بەمەرجێ هەڵگری ناسنامەی سەربازی و یەكێك لەم پێناسانە بێت، پاسپۆرت یان ناسنامەی مەدەنی یاخود كارتی نیشتمانی.