سەردێر

كەركوك، دوای هێنانەناوەوەی 50 ئۆتۆمبێلی بۆمبڕێژكراو دەستگیركرا

خەڵك-
شانەی میدیای ئەمنی حكومەتی عیراق، دەستگیركردی “تیرۆریستێك” ڕادەگەیەنێت كە بەشداریی كردووە لە هێنانە ناوەوەی 50 ئۆتۆمبێلی بۆمڕێژكراو بۆ پارێزگای سەڵاحەدین.


بەپێی بەیاننامەیەك كە لەلایەن شانەی میدیبای ئەمنییەوە بڵاوكرایەوە”زانیارییە هەواڵگرییە وردەكان و بەدواداچوونی مەیدانی بۆ شانە تیرۆریستییە نوستووەكان، بونە مایەی دەستگیركردنی تۆمەتبارێكی داواكراو بەپێی ماددەی 4ی تیرۆ لە پارێزگای كوركوك”.

هەر لە بەیاننامەكەدا هاتووە”دوای لێكۆڵینەوە دەركەوت كە لە ساڵی 2014 پەیوەندی كردووە بە گروپە تیرۆریستییەكان و لەژێر دەستی بەناو ئەمیری شەرعی ویلایەتی سەڵاحەدین كاریی كردووە، وێڕای كاركردن لە مەفرەزە تیرۆریستییەكان لە پارێزگای سەڵاحەدین كە هێزە ئەمنییەكانيان بەئامانجگرتووە”.

شانەی میدیای ئەمنی دەڵێت”تیرۆریستە دەستگیركراوەكە بەشداریی كردووە لە پەلامارەكەی سەر پاڵاوگەی بێجی كە 300 كەس بوون و 50 ئۆتۆمبێلی بۆمڕێژكراویان پێبوو، لەو دەمەدا تیرۆریستەكان ئۆتۆمبێلە بۆمڕێژكراوەكانیان بردە نێو پاڵاوگەی بێجی و لە پاش تەقاندنەوەیان، زیانێكی ماددی گەورە بە پاڵاوگەكە گەیشت”.