سەردێر

خەڵكێكی زۆر لە هەرێمەوە گەشتی عومرە دەكەن

خەڵك-

لەگەڵ هاتنی سەری ساڵی نوێی كۆچی و دەستپێكی وەرزی عومرە، ژمارەیەكی زۆری هاووڵاتیانی هەرێم خواستیان لەسەر بەجێهێنانی ئەو سوننەتە هەیە و تەنها لە دوو گەشتدا نزیكەی 200 عومرەكار ڕوویان لە سعودیە كردووە.

بەپێی زانیارییەكانی (خەڵك) لە ئێستادا ژمارەیەكی زۆری هاووڵاتیان خواستیان لە ئەنجامدانی گەشتی عومرە بۆ سعودیە هەیە و ڕۆژانە قەرەباڵغی بە كۆمپانیاكانی گەشتی حەج و عومەرەوە دیارە بۆ ناوتۆماركردن و ئەنجامدانی ڕێكارەكانی ئەو گەشتە ئیمانییە.

هەر بەپێی زانیارییەكان، بڕیارە لە سەرەتای مانگی داهاتوو لە 3ی ئەیلول كاروانێكی دیكەی عومرەكاران لە هەرێمەوە گەشتی سعودیە بكات.

شێخ نیاز ڕاغب نەقشبەندی، بەڕێوەبەری گشتی حەج و عومرەی هەرێم بۆ (خەڵك) ڕایگەیاند، بەپێی ڕێنمایی سعودیە، ڤاكسینی چینی (سینۆفارم) ڕێگەپێدراو نییە و تەنها ڤاكسینی (فایزەر) و جۆرەكانی دیكەی ئەمریكی و هەروەها (ئەسترازینیكا)ی بەریتانی ڕێگەپێدراوە بۆ چوونەناوەوەی هاووڵاتیان و عومرەكاران بۆ سعودیە.

ئاماژەی بەوەشكرد، سعودیە چەند مەرج و ڕێكارێكی دیاری كردووە بۆ چوونی عومرەكاران بەتایبەتی ڕێكاری تەندروستی، وەك خۆكوتان بە ڤاكسینی كۆرۆنا و كەمكردنەوەی قەرەباڵغی ناو پاسەكان و ئۆتێلەكان، كە هەر ژوورێك نابێت لە 2 كەس زیاتری تێدابێت.

ئاشكراشی كرد، كە تا ئێستا دوو كاروانی عومرەكارانی هەرێم چوونەتە سعودیە، كە ژمارەیان 194 كەسن، كاروانی یەكەمیان لە 21ی ئەم مانگە گەشتیان كردووە 94 كەس بوون و شەوی ڕابردوو 23ی ئاب كاروانی دووەم، كە 100 كەس بوون.