سەردێر

دەستەی دەستپاكی عیراق: ساڵی ڕابردوو دۆسیەی 63 وەزیر ڕەوانەی دادگا كراوە

خەڵك

دەستەی دەستپاكی لە عیراق ئاشكرای دەكات: ساڵی ڕابردوو دۆسیەی 63 وەزیر و 449 خاوەن پلەی تایبەت ڕەوانەی دادگا كراون، باس لەوەشدەكات 14 دۆسیەی گەندەڵی لە وەزارەتی كارەبا لێكۆڵینەوەیان لەبارەوە كراوە.
دەستەی دەستپاكی عیراق لە وەڵامی تۆمەتباركردنیان بەوەی نەیانتوانیوە لێپرسینەوە لەگەڵ وەزیر و بەڕێوەبەرانی گشتیی بكەن و تەنھا لێپرسینەوەیان لەگەڵ فەرمانبەرانی ئاسایی كردووە، ڕاگەیەندراوێكی بڵاوكردووەتەوە و تیایدا ھاتووە “لە ساڵی ڕابردوودا، لێكۆڵینەوەمان كردبوو لە دۆسیەی 63 وەزیر و 449 خاوەن پلە تایبەتەكان و بەڕێوەبەرانی گشتیی كە تۆمەتباركراون بە گەندەڵی و دۆسیەكانیشیان ڕەوانەی دادگا كراون”.

لە ڕاگەیەنراوەكدا ھاتووە”ھەر لەو ماوەیەدا، دادگا پشت بەستن بە لێكۆڵینەوەكانی دەستەی دەستپاكی 52 فەرمانی بانگھێشتكردن بەئامانجی لێكۆڵینەوە بۆ ژمارەیەك وەزیر و 369 خاوەن پلە تایبەتەكان و بەڕێوەبەرانی گشتیی دەركردبوو”.

لە ڕاگەیەنراوەكەی دەستەی دەستپاكی عیراقدا تیشكخراوەتەسەر، دۆسیەكانی گەندەڵی لە وەزارەتەكانی كارەبا، بازرگانیی، پیشەسازیی و كانزاكان و ھاتووە “ئەو كەسانەی كە بە پرسی گەندەڵی لە وەزارەتەكانی كارەبا، بازرگانیی، پیشەسازیی و كانزاكان تۆمەتباركراون، ژمارەیەك وەزیرن لەگەڵ 220 خاوەن پلە تایبەتەكان و بەڕێوەبەرانی گشتیی”.