سەردێر

چەند پێشنیارێك بۆ هەرزان كردنی نرخی ئارد و نان و سەمون ڕاگەیەنرا

خەڵك
قائیمقامی ناوەندی سلێمانی ڕایدەگەیەنێت، هیچ گۆڕانكاریكە لە ژمارەی نانی بازاڕ ڕوونادات و 8 نان بە هەزار دینارە، بەڕێوەبەری دروستكراوی دانەوێڵەی سلێمانی دەڵێت: “داوامان كردووە كارئاسانی بۆ نانەوا و سەمونخانەكان بكرێت تا نرخی نان و سەمون بەشێوەی جاران بمێنێتەوە”.

ئاوات محەمەد، قائیمقامی ناوەندی سلێمانی لە لێدوانێكی ڕۆژنامەوانیدا ڕایگەیاند، بەهیچ شێوەیەك ڕێگە نادەین ژمارەی نان كەم بكرێتەوە بۆ 6 نان، بەڵكو 8 نان بە هەزار دینار دەفرۆشرێتە هاووڵاتیان

لای خۆشیەوە، نەسرین محەمەد عەلی، بەڕێوەبەری دروستكراوی دانەوێڵەی سلێمانی بە (خەڵك)ی ڕاگەیاند، گرانبوونی گەنم لە سەر ئاستی جیهان ڕوویداوە و زیاتر پەیوەندی بە بۆڕسە و وشكەساڵیەوە هەیە لەو وڵاتانەی بەرهەمهێنەری گەنمن.

وتیشی، “ئێمە بۆ كارئاسانی نانەواخانە و سەمونخانەكان چەند داوایەكمان ئاڕاستەی ئەنجوومەنی وەزیران و وەزارەتی بازرگانی هەرێم كردووە، تا كارئاسانی بۆ كاری ئەو دوو پیشەیە بكات، كە ئێمە مۆڵەتیان پێ‌ دەدەین و بەرپرسین لە كارەكانیان هەروەها ئازادمان كردوون، كە لەكوێ ئارد دەكڕن بۆ بەكارهێنان”.

ڕاشیگەیاند، داوامان لە حكومەت كردووە كرێی كارەبان لەسەر كەم بكاتەوە و جیاوازی نانەوایەك و كارگەیەكی توانەوەی ئاسن بكەن لە ڕووی نرخی كارەباوە، هەروەها داوامان كردووە وەزارەتی سامانە سروشتیەكان گازیان بە هەر بڕێك بێت بۆیان دابین بكات وەك پێشتر.

ئاماژەی بۆ ئەوەشكرد، ئەو باجەی خراوەتەسەر هاوردەی ئارد لەدەرەوە، كە بەهەموویەوە نزیكەی 35 بۆ 45 دۆلارە بۆ هەر تەنێك دەبێت لاببرێت تا ئەو بڕە پارەش بگەڕێتەوە و نرخی ئارد هەرزانتر بێت.

ئاشكراشی كرد، پێویستە نانەواخانەكان ڕەچاوی تەندروستی هاووڵاتیان بكەن و سوود لەو ئاردە خۆماڵییەی خۆمان وەربگرن هەر چەندە بۆرە، بەڵام تەندروستە بەڕێژەیەكی باش كەپەكی تێدایە، كە لە ناوخۆ بەرهەم دەهێنرێت و دەزانین چۆن كراوەتە ئارد لەگەڵ ئەوەی ئاردی دەرەوە نازانرێت تا چەند تەندروستە.

بەپێی ستانداری عێراقی بۆ دروست كردنی ئارد 80 بە 20 دیاریكراوە، كە لەهەر 100 كیلۆ گەنم 80 كیلۆی دەبێتە ئارد و 20 كیلۆی كەپەك، بۆ هەموو سنوری سلێمانی مانگانە 23 هەزار تەن گەنم دەكرێتە ئارد و 18 هەزار و 162 تەن ئارد دابەشدەكرێت لەچوارچێوەی بەشەخۆراكی مانگانەدا.