سەردێر

پەكەكە بۆ پارتی: بۆچی هێرشتان كردە سەر گەریلا لە خەلیفان؟

خەڵك-

ئەندامێكی كۆنسەی بەڕێوبەریی كۆما جڤاكێن كوردستان (كەجەكە) پەیامێك ئاڕاستەی پارتی دیموكراتی كوردستان دەكات لەسەر “هێرشەكانیان بۆ سەر گەریلا” و دەپرسێت، “ئایا ئەمە هۆكارێك نییە بۆ هەڵگیرساندنی شەڕ؟ بەڵام بەهۆی خەمخۆری گەریلاوە شەڕ نەهاتووەتە ئاراوە” و دەشڵێت: “ئیتر ئەو ئارامگرتنەش كۆتایی هاتووە و چەقۆ گەیشتۆتە سەر ئێسقان”.

مستەفا قەرەسوو، ئەندامی كۆنسەی بەڕێوبەریی كۆما جڤاكێن كوردستان (كەجەكە) لە بەرنامەیەكی تەلەفزیۆنی (مەدیا هەبەر) ڕایگەیاندووە، دەوڵەتی تورك هەموو ساڵێك دەڵێت پەكەكە لەناودەبەین، بەڵام بەپێچەوانەوە گەریلا و سیاسەت مەزتر دەبن.

ڕاشیگەیاند، گەمارۆدانی هەرێمەكانی گەریلا كارێكی نائەخلاقییە و دەیانەوێت بەم هەڵوێستەیان ڕۆڵەی گەلی كورد بەكوشت بدەن.

قەرەسوو وتی، “چەند ڕۆژێك پێش ئێستا پارتی لەگەڵ كاربەدەستانی دەوڵەتی تورك كۆبوونەتەوە، دوای ئەو دیدارە ویستیان لە شیلادزێوە لەشكركێشی بكەن، بەڵام بەهۆی هەڵوێستی خەمخۆری گەریلاوە، ڕێگری لە ڕوودانی شەڕ كرا، بەڵام ئیتر ئەو ئارامگرتنەش كۆتایی هاتووە و چەقۆ گەیشتۆتە سەر ئێسقان”.

لەسەر ڕووداوەكەی خەلیفان و بێسەرشوێنبوونی گروپێك گەریلا، ئەو بەرپرسەی كەجەكە وتیشی، “هێشتا چارەنووسی ئەو گروپە گەریلایە نازانین، هەپەگە داوای ڕوونكردنەوە كردووە، بەڵام پەدەكە وەڵام ناداتەوە، ئێمە لە پەدەكە دەپرسین بۆچی هێرشت كردە سەر گەریلاكان؟، ئایا ئەمە هۆكارێك نییە بۆ هەڵگیرساندنی شەڕ؟، دەبێت پەدەكە ڕوونكردنەوە بدات چی بەسەر سێ گەریلاماندا لە خەلیفان هاتووە؟”.