سەردێر

كەم ئەزموونەكان، ئەدای پەڕلەمانیان لاواز كردووە

خەڵك-

چاودێرێكی سیاسی ڕایدەگەیەنێت، بەهۆی ئەوەی پەڕلەمان كەسانێك دێنە ناوی كە دەبێت زیاتر ناسراو بن یا خود پاڵپشتێكیان هەبێت، ئەمەش وایكردووە كۆمەڵە كەسێك بێنە پەڕلەمان كە كەم ئەزموون بن و چالاك نەبن.

بڕیارە مانگی ئۆكتۆبەری ئەمساڵ هەڵبژاردنی پێشوەختەی عێراق بەڕێوەبچێت، ئەمەش لەكاتێكدایە كە ژمارەیەك لە لایەنە سیاسییەكان بایكۆتی هەڵبژاردنەكانیان كردووە و هاوكات بەشێك لە چاودێرانی سیاسی پێیانوایە كەم ئەزموونی بەشێك لە كاندید و پەڕلەمانتارەكانی خولەكانی پەڕلەمان وایكردووە چالاكی و كارەكانی پەڕلەمان لە كاری بنەڕەتی خۆی لابدات.

یاسین تەها چاودێری سیاسی بە (خەڵك)ی ڕاگەیاند، هەڵبژاردن سیستمێكی بازنەییە، مەبەست لەو بازنەیە ئەوەیە كە دەبێت كاندیدەكانی ناوی زیاتر ناسراو بن و دیاریكردنەكە كەوتووەتەوەسەر لیستە سیاسییەكان.
وتیشی”لە عێراقدا و كوردستانیش زیاتر كەسانی ئایینی یاخود عەشایەر و چالاكوان و میدیایی واتە ئەوانەی كە چانسیان زۆرترە ئەوانە هەڵبژێردراون، چونكە یاساكە ڕێگە بەوە دەدات و هەلی خۆكاندیدكردن زیاتر بۆ ئەوانەیە كە ناسراون یاخود پاڵپشتێكیان هەیە، ئەمەش وا دەكات كۆمەڵە كەسێك بێتە پەڕلەمان كە كەم ئەزموون بن، ڕەنگە چالاك نەبن هەروەك لە ئێستادا پەڕلەمانی كوردستان گلەییان هەیە، لە عێراق كە لەكۆی ٣٢٩ ئەندام پەڕلەمان دەتوانین بڵێین ئەوانەی ناسراون لە پەنجەی دەست تێناپەڕن”.

باسی لەوەش كرد، كاندیدكردنی ئەو كەسانە، بەشێكی پەیوەندی هەیە بە سستكردنی ئەدای پەڕلەمان كە لەم ساڵانەی دوایدا چ لە بەغدا و چ لە كوردستانیش بەردەوام پەراوێز دەكرێن و ئەگەر باس لەم خولەی كۆتایی پەڕلەمانی عێراق بكەین بەپێی ئامارەكانی كە كراون لەسەر خولەكانی پەڕلەمان تەمەڵترین خولە لەچاو هەرسێ خولەكەی پێشوو.

جەختی لەوەش كردەوە، لە كوردستانیش بەهەمانشێوە ئەو پاشەكشێیە هەیە، كە بەشێكی دەسەڵات بەڕێوەی دەبات و نایەوێت پەڕلەمان چالاك بێت، ئەوەش پەیوەندی هەیە بەوەی ئەوكەسانەی لە بوارێك لە بوارەكان ناسراون و لە پەڕلەماندان، مەرج نییە عەقڵییەتی پەڕلەمانیان هەبێت یاخود تەنها لە باگراوندێكەوە هاتوون كە ناسراون یاخود پێشكەشكارن واتە مەرج نییە پەڕلەمانتارێكی سەركەوتووبن.