سەردێر

“سلێمانی ئاودانی پێویستە نەك هەڵمەتی نەمامچاندن”

خەڵك

هاوسەرۆكی بۆردی ڕێكخراوە ژینگەییەكانی سلێمانی – هەڵەبجە ڕایدەگەیەنێت: سلێمانی ئاودانی پێویستە نەك هەڵمەتی نەمامچاندن.

مەعرووف مەجید هاوسەرۆكی بۆردی ڕێكخراوە ژینگەییەكانی سلێمانی-هەڵەبجە لە پەیامێكدا كە ئاڕاستەی قوباد تاڵەبانی جێگری سەرۆكی حكومەتی هەرێمی كردووە ڕایدەگەیەنێت:”پێش وەرزی ئاودان، پەیامێكمان بڵاو كردەوە كە باسمان لە مەترسی وشكبوون گرفتی ئاونەدانی پارك و بلوار و باخچەكانی سلێمانی كرد، بەڵام بە داخەوە، دوای چەندین بابەتی ڕۆژنامەوانی و سازدانی چەندین بەرنامەی تەلەفیزیۆنی و دواتر، سەردانی نووسینگەی پەڕلەمانی كوردستان لە سلێمانی وەكو بۆردی ڕێكخراوە ژینگەییەكانی سلێمانی-هەڵەبجە، یاداشتێكمان ئاڕاستەی سەرۆكایەتی پەڕلەمان كرد، بەڵام بە داخەوە هیچ سوودی نەبوو، ئێمە ترسمان لەم ڕۆژە بوو كە ئاودان بكەوێتە مانگی( هەشت و نۆ) وە كە بەداخەوە ڕێك وادەرچوو”.

مەعرووف مەجید ئاماژی بەوەشكردووە:”سەرەڕای چارەسەرنەكردنی ئاودانی فەڕمی باخچە و بلوار و درەختەكانی سلێمانی، چەند ڕۆژێكە دەنگۆی هەڵمەتی نەمامچاندن و جوانكردنی ژینگەی سلێمانی بڵاوبۆتەوە، هەر كەسێ ئەو كارە بكات جێگای دەستخۆشییە و سوپاسی دەكەین، بەڵام هەڵمەتی نەمامچاندن و مانگی ئاب ئەمە كێ ئەم بیرۆكەیەی بەو بەڕێزانە ووتووە؟!”.

مەعرووف مەجید دەشڵێت:”ئەوەی دیارە هەڵمەتەكە لەلایەن جێگری سەرۆكی حكومەت كاك قوباد تاڵەبانی بەڕێوەدەچێت، من لە كاك قوباد و ڕاوێژكارەكانی دەپرسم، لە ئێستادا ئێوە هەستتان بەوە كردووە سلێمانی دار و سەوزایی كەمە یاخود، پێویستە ئەوەی هەیەتی لە فەوتان بیپارێزین؟!”.
هاوسەرۆكی بۆردی ڕێكخراوە ژینگەییەكانی سلێمانی-هەڵەبجە ڕاشیگەیاندووە:”ئێوە ئەوەتان زانیوە، سلێمانی لە سەر ئاستی عیراق بە پلەی یەكەم دێت لە زۆری ڕێژەیی سەوزایی، كە باس 19% دەكرێت كە ئەمە مایەی دڵخۆشییە. بەڵام ئەوەی مایەی نیگەرانییە، ماوەی حەوت ساڵە سلێمانی لە كاتی ئاوداندا گرفتی بۆ دروست دەكرێ، ئیتر هۆكارەكەی چیە ئەوە دەبێ جەنابتان بەدواداچوونی بۆ بكەن، لە كوێی دونیادا بووە، بڕیاری سەرۆكی حكومەت بۆ پارەی ئاودان دوای نزیكەی (80 )ڕۆژ نەچێتەبواری جێبەجێكردنەوی؟!”.

دەشپرسێت:” ئایا بەو پێیەی جەنابت جێگری سەرۆكی حكومەتی، كارەكانی باخچەكانی هەولێر و دهۆكیش هەمان گرفتیان هەیە یا ئەوان گرفتیان نیە؟!”.

هاوسەرۆكی بۆردی ڕێكخراوە ژینگەییەكانی سلێمانی-هەڵەبجە ئەوەشی خستووەتەڕوو:”لە هەمووشی سەیر تر پۆستێكی بێگەرد تاڵەبانیم بینی دەڵێ 100 هەزار نەمام بۆ سلێمانی دابین دەكەین، من لە بێگەرد خان دەپرسم، لە چی ساڵێكدا لە نەمامگەكانی وەزارەتەكەت، لە مانگی8 دا نەمام دراوە بەهاوڵاتیان، ئایا ئێستا كەی كاتی گواستنەوەی نەمامی ناو كیسە لەوەش خراپتر ئەو گواستنەوەیە بۆ چاندن بێت.”

ڕوونیشی كردووەتەوە:”ساڵانە پێش مانگی (5) پێدانی نەمام و فرۆشتنی ڕادەگیرێت، بۆیە هیوادارم ئەم كارانە پێش ئەنجامدانی پرس بە كەسانی پسپۆڕی كشتوكاڵی بكرێ ئەوكات بڕیاری لێبدرێت، ئەگینا ئەم هەڵمەتانەش دەبن بە ئەرشیف و تەنها وێنەكان دەمێننەوە، من بەڵگەم لای زۆرینەی ئەو نەمامانەی ئەمساڵ چاندراون لە سنووری سلێمانی ووشك بوون لەبەر نەبارینیبارانی باش لە بەهاردا و دواتریش ئاونەدانی لە وەرزی هاویندا، تكایە دووبارەی دەكەمەوە، با بەهەموومان ئەوەی هەیە لە فەوتان ڕزگاریان بكەین، كات و دەرفەتی تر زۆرن بۆ هەڵمەتی نەمامچاندن…”

 

وێنەی بەشێك لە بلوارەكانی سلێمانی و ئەو هەڵمەتانەی ئەنجامدراون لەسلێمانی كە دواتر ووشك بوون..