سەردێر

ڕێگای دووسایدی وارماوا- دەربەندیخان تا گوندی میرەدێ كرایەوە

خەڵك-

وەزیری ئاوەدانكردنەوەو نیشتەجێكردن پڕۆژەكانی سنوری گەرمیان بەسەر دەكاتەوە و ڕێگای دووسایدی وارماوا- دەربەندیخان تا گوندی میرەدێ بەڕووی شۆفێراندا دەكاتەوە و دەشڵێت: “پێش كۆتایی ئەمساڵ ڕێگای دووسایدی پەروێزخان- كەلار دەچێتە بواری جێبەجێكردنەوە”.

دانا عەبدولكەریم، وەزیری ئاوەدانكردنەوە و نیشتەجێكردن ژمارەیەك پڕۆژەی وەزارەتی لە سنوری وارماوا و دەربەندیخان و گەرمیان بەسەركردەوە، لەو چوارچێوەیەدا سەردانی ڕێگای دووسایدی وارماوا- دەربەندیخانی كرد و بەشێوەیەكی فەرمی ڕێگاكەی تا گوندی میرەدێی كردەوە.

دانا عەبدولكەریم لە كۆنگرەیەكی ڕۆژنامەوانیدا ڕایگەیاند، ڕێگای دووسایدی وارماوا- دەربەندیخان بەدرێژیی 7 كیلۆمەترە و ئەمڕۆ بەڕووی شۆفێراندا كرایەوە لەگەڵ تەواوكردنی ڕێگایەكی دووساید لەناو ناحیەی وارماوا (وارماوا/ شارەزور).

وەزیری ئاوەدانكردنەوە و نیشتەجێكردن، سەردانی ئیدارەی گەرمیانی كرد و لەمیانی بەسەركردنەوەی ژمارەیەك لە پڕۆژەكانی سنورەكە سەبارەت بە ڕێگای دووسایدی پەروێزخان-كەلار وتی، “خۆشبەختانە ڕەزامەندی لەسەر ئەو پڕۆژەیە دراوە و ئومێدەوارین پێش كۆتایی ئەمساڵ دەستبكەین بەجێبەجێكردنی”.