سەردێر

ڕۆتینات، پارك و بلوارەكانی سلێمانی ووشك كرد

خەڵك-

سەرۆكی ئەنجومەنی پارێزگای سلێمانی ڕایدەگەیەنێت، لە ئێستادا داوامان لە سەرمایەداران نەكردووە بۆ بەدەمەوەچوونی گرفتی وشكە ساڵی و وشكبوونی سەزاییەكانی سلێمانی.
ئەمساڵ بەهۆی وشكە ساڵی لەلایەك و بەدەمەوە نەچوونی حكومەت وەك پێویست و لەكاتی خۆیدا، گرفت بۆ بلوار و سەزایی شەقام و پاركەكانی شاری سلێمانی دروست بووە و بەرپرسانی پاركەكانی شاری سلێمانیش هۆشاری ووشكبوون پاركەكان دەدەن و بەهۆی ڕۆتیناتیشنەوە حكومەت نەیتوانیوە بودجەی پێویست ڕەوانە بكات.

ئازاد محەمەد ئەمین سەرۆكی ئەنجومەنی پارێزگای سلێمانی بە (خەڵك)ی ڕاگەیاند، بودجەی پێویست بۆ پارك و بلوارەكان تەرخانكراوە بەڵام نەچوەتە بواری جێبەجێكردنەوە و هەمووشمان دادمانە لەسەر وشكبوونی سەوزاییەكانی سلێمانی.

وتیشی”لەسەر ڕاسپاردەی جێگیری سەرۆكی حكومەت بلوارەكانی ناو شار و مەلیك مەحمود و بەشێكی جوانكاری و ئاوەدانكردنەوەی سەوزاییەكانی دەستیپێكردووە، بەڵام ئەوەی پاركی هەواری شار بودجەكەی زۆرە و دەبێت چاوەڕێی بودجەكەی بكەین”.

ئاشكراشیكرد، لە ڕابردووشدا بۆ بابەتی كۆرۆنا و نەخۆشخانەی كۆرۆنا و هاوكاری كەمدەرامەتان و هەژارەكان و پێشتریش بۆ بەرەكانی جەنگ بۆ هاوكاری هێزی پێشمەرگە داوامان لە سەرمایەداران كردووە، بەڵام ئێستا داواكارییەكانمان ئاڕاستەی حكومەت كردووە و بە فەڕمی هیچ داوایەكمان لەو سەرمایەدارانە نەكردووە بۆ پێشكەشكردنی هاوكارییەكانیان بۆ پاركەكان، سیستمی تەندەرینەكەش دوو هەفتەی پێدەچێت.

ڕوونیشیكردەوە، كارەكانی پاركی هەواری شار، ڕۆژی پێنج شەممە تەندەرینی بۆ كراوە، بەڵام یەك كەس گەڕاندویەتییەوە، بەپێی یاساكە یەك كەس نابێت، بەڵام بۆ جاری دووەم یەك كەسیش بێت كێشەی نییە.
جەختیشی كردەوە، پارەكە كێشەی نییە وەزارەتی دارایی ڕەزامەندی لەسەرداوە و هەركاتێك تەندرەكە تەواو بێت پارەكە دەتوانرێت وەربگیرێت.