سەردێر

پارێزگای هەولێر: دەست بە دابەشكردنی ئاوی ئیفراز دەكرێتەوە

خەڵك

پارێزگای هەولێر ئەمڕۆ هەینی لە ڕوونكردنەوەیەكدا ڕایگەیاند، وەستانی پڕۆژەی ئاوی ئیفراز، هۆكارەكەی گۆڕانی كەشوهەوایە و لەدەستی مرۆڤ بەدەرە، هۆكاری وەستانی پڕۆژەكە لێڵبوونی ئاوی زێی گەورەبووە و هاووڵاتییان دڵنیا دەكەینەوە، كە دوای چەند كاتژمێرێكی تر پڕۆژەكانی ئیفراز (یەك، دوو، سێ) بەكاردەخرێتەوە و ئاو دەگاتەوە ماڵەكانی هاووڵاتیان.

لە ڕوونكردنەوەكەی پارێزگای هەولێردا هاتووە، بەپێی ستاندار توانای كاركردنی پڕۆژەكانی ئیفراز (یەك، دوو، سێ) تا ئەو ڕادەیەی دەتوانێت كاربكات، كە شێلویی ئاو بگاتە (1500) ئینجا دەتوانێت ئاو بگەینرێتە ھاووڵاتیان، بەڵام ڕادەی شێلوبوونی ئاوی زێی گەورە گەیشتبووە (18,000) بۆیە پڕۆژەكە وەستێنرابوو.

 

دەقی ڕوونكردنەوەی پارێزگای هەولێر:

ماوەی چەند رۆژێكە گۆڕانی كەشوهەوا و هاتنی شەپۆڵێكی باران، كە بووە هۆی شێلوبوونی و هێنانی قوڕ و لیتەیەكی زۆر بۆ نێو ئاوی زێی گەورە و وەستانی پڕۆژەكانی ئیفراز (یەك، دوو، سێ) كە ئاوی پارێزگای هەولێر دابین دەكات، بەمەش بۆماوەیەك بەشێكی زۆری دانیشتووانی شارەكەمان بێ ئاوی خواردنەوە ماونەوە.

بەپێویستی دەزانین بۆ هەموو لایەك روونبكەینەوه،‌ ئەوەی روویداوە تەنیا هۆكارەكەی گۆڕانكاری بووە لە كەشوهەوا و بەرزبوونەوەی پلەی گەرمی و ئەو بارانەی كە لە ناوچە سنووری و شاخاوییەكان باریوە و لەگەڵیدا بەڕادەیەكی زۆر قوڕ و لیتەی خستووەتە ناو ئاوی زێی گەورە، كە رادەی شێلوبوونی ئاوی گەیاندە (18,000) ھەزار، كە بەپێی ستاندار توانای كاركردنی پڕۆژەكانی ئیفراز (یەك، دوو، سێ) تا ئەو رادەیەی دەتوانێت كاربكات، كە شێلویی ئاو بگاتە (1500) ئینجا دەتوانێت ئاو بگەینرێتە ھاووڵاتیان، بەرزبوونەوەی ئاستی شێلوی ئاو بەو رادە زۆرە مەترسی خستە سەر پڕۆژەكانی ئاوی (شەقڵاوە – پیرمام) و ئاوی ئیفراز (یەك، دوو، سێ) كە ئەگەر بەردەوام لەكاركردن بووایە، بۆی هەبوو بەیەكجار لەكار بكەوێت، بۆیە بە ناچاری بۆ ماوەیەك پڕۆژەكانی ئاو گیرایەوە، تا شێلوبوونی ئاوەكە دابەزێت، ئەوەش ‌حاڵەتێكی سرووشتییە و لەدەستی مرۆڤ بەدەرە، له ‌وەرزی زستانیش روودەدات، بەڵام زیاتر لەوەرزی هاویندا هاوڵاتییان هەستی پێدەكەن، چونكە بەڕێژەیەكی زیاتر پێویستیان بە بەكارهێنانی ئاو هەیە و ئاستی ئاوی رووبارەكانیش كەمترە، ئێستاش هاووڵاتییان دڵنیا دەكەینەوە، كە دوای چەند كاتژمێرێكی دیكە پڕۆژەكانی ئیفراز (یەك، دوو، سێ) بەكاردەخرێتەوە و ئاو دەگاتەوە ماڵەكانی هاووڵاتیان. هەروەها تەواوی گرفت و كێشەكانی پڕۆژەی ئاوی (قەندیل)یش چارەسەركراوە و پڕۆژەكە دەكەوێتەوەكار.

لێرەشەوە بەپێویستی دەزانین سوپاسی دەزگای خێرخوازی بارزانی و بەڕێوەبەرایەتی ئاو و ئاوەڕۆكانی هەولێر و دەوروبەر و سۆران و تیمی شارەوانییەكان بكەین، كە لەماوەی رابردوودا بەهۆی كەم ئاوی لەڕێگەی تەنكەر ئاوی ماڵانیان له ‌گەڕەكەكان دابینكردووە، جارێكی دیكە هاوڵاتییانی شاری هەولێر دڵنیادەكەینەوە لە چوارچێوەی بەرنامە و پلانەكانی پارێزگای هەولێر بۆ رووبەرووبوونەوەی قەیران و كێشە و گرفتەكانی وشكەساڵی، لەڕێگەی ژووری عەمەلیاتی پارێزگای هەولێر، كە لە سەرجەم لایەنە پەیوەندیدارەكان پێكهێنراوە بۆ چارەسەركردن و دەستنیشانكردنی گرفتەكانی كەم ئاوی، ئێستا لە قۆناغی كۆتایی و زاڵبوونداین بەسەر ئەو قەیرانانەی كە لەماوەی ئەمساڵدا بەهۆی وشكەساڵی رووبەڕووی بووینەوە.

نووسینگەی پارێزگاری هەولێر
2021.8.6