سەردێر

ئەمڕۆ ڕەئیسی وەك سەرۆك كۆماری ئێران دەستنیشان دەكرێت

خەڵك-

ئەمڕۆ سێ شەممە ئیبراهیم ڕەئیسی سەرۆك كۆماری نوێی ئێران، دەسەڵاتەكانی سەرۆكایەتی كۆمار لە عەلی خامنەیی ڕێبەری باڵای شۆڕشی كۆماری ئیسلامیی ئیران وەردەگرێت.

ئاژانسی ئیرنای ئێرانی بڵاویكردەوە، كاتژمێر 9ی ئەمڕۆ لە ڕێوڕەسمێكدا لە شاری تاران، ڕێبەری باڵای شۆڕشی كۆماری ئیسلامیی ئیران بە پەسندكردنی ئەنجامەكانی دوایین هەڵبژاردنی سەرۆكایەتی كۆمار، ئیبراهیم ڕەئیسی وەك سەرۆك كۆماری نوێی ئێران دەستنیشان دەكات.

بەپێی زانیارییەكان، بڕیارە ڕۆژی پێنج شەممەی داهاتوو ڕێوڕەسمی دەستبەكاربوون و سوێندخواردنی ڕەئیسی وەك سەرۆكی نوێی ئێران لە پەڕلەمان بەڕێوەبچێت.

هەر بەپێی زانیارییەكان، شاندێكی باڵای هەرێمی كوردستان بە سەرۆكایەتی نێچیرڤان بارزانی سەرۆكی هەرێمی كوردستان بە مەبەستی بەشداریكردن لە ڕێوڕەسیمی سوێند خواردنی ڕەئیسی سەردانی ئێران دەكەن.

ئەندامانی شاندەكەی هەرێمی كوردستان پێكهاتوون لە سەفین دزەیی سەرۆكی فەرمانگەی پەیوەندییەكانی دەرەوەی هەرێم و كوێستان محەمەد وەزیری كاروباری كۆمەڵایەتی و محەممەد حەمەسەعید وەزیری ڕۆشنبیری و لاوان و نازم دەباغ نوێنەری حكومەتی هەرێم لە تاران.

ئیبراهیم رەئیسی، ساڵی 1960 لە مەشهەد لە دایكبووە و دوو كچی هەیە، ساڵی 1985 بووەتە جێگری داواكاری گشتی تاران، ساڵی 1989 تا 1994 بووەتە سەرۆكی داواكاری گشتی ئێران لە تاران، ساڵی 1994 تا 2004 بووەتە سەرۆكی دەزگای پشكنین و چاودرێری گشتی. هەروەها ساڵی 2007 بووەتە ئەندامی ئەنجومەنی شارەزایان. 2004 تا 2014 بووەتە جێگری سەرۆكی دەسەڵاتی دادوەری ئێران. ساڵی2014 تا 2016 بووەتە داواكاری گشتی ئێران، ساڵی 2017 خۆی كاندید كرد بۆ هەڵبژاردنی سەرۆك كۆماری ئێران، ساڵی 2019 بووەتە سەرۆكی دەسەڵاتی دادوەری ئێران و لە تەمەنی 60 ساڵی و لە خولی یەكەمی هەڵبژاردنی سەرۆكایەتی توانی 62٪ دەنگەكان بەدەستبهێنێت و بە هەشتەمین سەرۆك كۆماری ئیسلامی ئێران هەڵبژێردرا.