سەردێر

عومەر جەبار: كورتەباڵاكان گرفتیان زۆرە و پێویستە چارەسەر بكرێن

سلێمانی – نزار جەزا

سەرۆكی كۆمەڵەی كورتەباڵاكانی كوردستان لەم چاوپێكەوتنەیدا لەگەڵ (خەڵك) باسی لەو گرفت و كێشانە كرد، كە ڕۆژانە ڕووبەڕوویان دەبنەوە و مووچەكەشیان زۆر كەمە و چەندین جار داوایان كردووە مووچەكەیان لە ٥٠٠ هەزار دینار كەمتر نەبێت، بەڵام گوێیان لێ نەگیراوە.

عومەر جەبار، سەرۆكی كۆمەڵەی كورتەباڵاكانی كوردستان ئاماژەی بەئەوەدا، كورتەباڵاكان مانگانە ١٥٠ هەزار دینار وەردەگرن، ئەو مووچەیەش بەشی بژێوی ژیانیان ناكات، لەدەرەوەش كە دەیانەوێت كاربكەن، بەئاسانی كاریان دەستناكەوێت.

ناوبراو باسی لەئەوەشكرد، لەڕووی تەندروستی و خوێندن و نیشتەجێبوونەوە گرفتیان هەیە و پێویستە حكومەتی هەرێم لەو ڕووەوە هاوكاریان بێت.

ئەوەشی خستەڕوو، پێویستە حكومەت و پەڕلەمان كاری جدی بكات بۆ كورتەباڵاكان و خاوەن پێداویستيە تایبەتەكان.

وتیشی، “نابێت بەچاوی بەزەییەوە تەماشای كورتەباڵاكان بكرێت، بەڵكو دەبێت بەچاوی ڕێزەوە تەماشا بكرێن و كارئاسانییان بۆ بكرێت”.

ئەوەشی باسكرد، لەساڵی ٢٠٠٨ەوە نووسراو ئاڕاستەی لایەنە پەیوەندیدارەكان دەكەن، بۆئەوەی هەر بینایەك، كە دروست دەكرێت پێویستە بۆ خاوەن پێداویستیە تایبەتەكان گونجاوبێت، ئەگەر گونجاو نەبێت، موڵەتی پێ نادرێت.