سەردێر

ژووری ئۆپەراسیۆنی هەولێر داواجار هاووڵاتیان ئاگادار دەكاتەوە

خەڵك
ژووری ئۆپەراسیۆنی پارێزگای هەولێر ڕایدەگەیەنێت ، ڕەوشی تەندروستی شارەكەمان بەهۆی بڵاو بوونەوەی زنجیرەی نوێی ڤایرۆسی كۆرۆنا مەترسیدارە و مەترسییەكانی هەڵكشان و تەشەنەسەندنی كۆرۆنای نوێش ڕۆژ دوای ڕۆژ لە زیاد بوون دایە بەداخەوە هاووڵاتیان وەك پێویست پابەندی ڕێنماییەكان نابن .

ژووری ئۆپەراسیۆنی پارێزگای هەولێر لە ڕاگەیەنراوێكدا بڵاویكردەوە، كە دۆخەكە هەستیارە و ڕەوشی تەندروستی شارەكەمان مەترسیدارە و ژمارەی تووشبوانی زنجیرەی نوێی ڤایرۆسی كۆرۆناش لە زیاد بووندایە بۆیە جارێكی تر هۆشداری دەدەین بە هاووڵاتییانی شارەكەمان كە پابەندی ئەو بڕیارە بن و ڕەچاوی ڕێكارەكانی خۆپارێزی بكەن.

ڕاشیگەیاندووە، هەر هاووڵاتییەك پرسە لە (كۆڵان – هۆڵ – ماڵ – ژێرخێوەت – باخچە و هەرشوێنێكی تر) دابنێت، لەلایەن هێزەكانی پۆلیس دەست بەجێ پرسەكەی دادەخرێت و بەپێبژاردن سزا دەدرێت.

 

ڕاگەیندراوێك لە ژووری ئۆپەراسیۆنی پارێزگای هەولێر
ڕەوشی تەندروستی شارەكەمان بەهۆی بڵاو بوونەوەی زنجیرەی نوێی ڤایرۆسی كۆرۆنا مەترسیدارە و مەترسییەكانی هەڵكشان و تەشەنەسەندنی كۆرۆنای نوێش ڕۆژ دوای ڕۆژ لە زیاد بوون دایە بۆ سەرگیانی هاوڵاتییان، لەپێناو پاراستنی تەندروستی و سەلامەتی شارەكەمان، ژووری ئۆپەراسیۆنی پارێزگای هەولێر، تەواوی هاوڵاتییان و دانیشتوانی سنووری پارێزگای هەولێر ئاگاداردەكاتەوە.
یەكەم/ هەروەك لە ڕاگەیندراوی ڕۆژی 2021.7.27، ڕامانگەیاندووە، پرسەدانان لە (كۆڵان – هۆڵ – ماڵ – ژێرخێوەت – باخچە و هەرشوێنێكی تر) قەدەغەیە و هەر كەسێك پابەند نەبێت سزا دەدرێت، بەڵام بەداخەوە بەهۆی زۆری ژمارەی مردووان بەهۆی ئەم ڤایرۆسەوە، بەشێك لەهاوڵاتییان پابەندنین و ئاگادارین سەرپێچی لەم بڕیارە دەكرێت، بۆیە جارێكی تر هۆشداری دەدەین بە هاوڵاتییانی شارەكەمان كە پابەندی ئەو بڕیارەبن و ڕەچاوی ڕێكارەكانی خۆپارێزی بكەن، بەپێچەوانەوە هەر هاوڵاتییەك پرسە لە (كۆڵان – هۆڵ – ماڵ – ژێرخێوەت – باخچە و هەرشوێنێكی تر) دابنێت، لەلایەن هێزەكانی پۆلیس دەست بەجێ پرسەكەی دادەخرێت و بەپێبژاردن سزا دەدرێت.
دووەم/ دۆخەكە هەستیارە و ڕەوشی تەندروستی شارەكەمان مەترسیدارە و ژمارەی تووشبوانی زنجیرەی نوێی ڤایرۆسی كۆرۆناش لە زیاد بوون دایە، بەوهۆیەوە لەنێو نەخۆشخانەكان ژمارەیەكی زۆر لە كەس و كار و خانەوادە و خزمانی تووشبوان سەردانی نەخۆشخانەكان دەكەن و لەبەردەم نەخۆشخانەكانی تایبەت بەچارەسەری تووشبوانی كۆرۆنا دەمێنەوە و قەرەباڵغی زۆر دروست دەكەن، ئەوەش هۆكارێكی دیكەی زیادبوونی ژمارەی تووشبوان و بڵاوبوونەوە و تەشەنەسەندنی كۆرۆنایە، بۆ ئەو مەبەستە هاوڵاتییانی سنووری پارێزگاكەمان ئاگاداردەكەینەوە، سەردانی تووشبوانی كۆرۆنا لە نەخۆشخانەكان و مانەوە و دروستكردنی قەرەباڵغی لەبەردەم نەخۆشخانەكان بەهەموو شێوەیەك قەدەغەیە و هەركەس و لایەنێك پابەند نەبێت ڕێكاری یاسایی لەبەرمبەردا دەگیرێتەبەر.
سێیەم/ سەرجەم هێزەكانی ناوخۆ (ئاسایش، پۆلیس، زێرەڤانی، پێشمەرگە، پۆلیسی هاتوچۆ) ڕاسپاردراون ئامادەكاریی بۆ جێبەجێكردنی ئەم بڕیارانە بكەن، ئەو بڕیارانەش سەرجەم قائیمقامیەتەكانی سنووری پارێزگای هەولێر دەگرێتەوە.
ژووری ئۆپەراسیۆنی پارێزگای هەولێر
2021.7.30