سەردێر

بەڵێنەكەی حكومەت بۆ هەرزان كردنی بەنزین گەیشت بەكوێ‌؟

خەڵك-
لە ماوەی ڕابردوودا و پێش جەژنی قوربان، بەڵێنێكی حكومەت لە زاری ژمارەیەك لە پەڕلەمانتارانەوە ڕاگەیەنرا بۆ هەرزان كردنی نرخی بەنزین، بەڵام زیاتر لە هەفتەیەك تێپەڕیوە و هێشتا نرخی بەنزین گرانە و یەك دینار لە نرخەكەی هەرزان نەبووە.

لە دوو هەفتەی ڕابردوودا ژمارەیەك لە پەڕلەمانتاران ئاماژەیان بەوەكرد، كە گفتوگۆ لەگەڵ وەزارەتی سامانە سروشتییەكان كراوە و بەڵێنی ئەوە دراوە، كە نرخی بەنزین هەرزان دەكرێت و بەئەگەرێكی زۆرەوە پێش جەژن یان ڕاستەوخۆ دوای جەژن نرخی بەنزین هەرزان دەبێت.

لە بەدواداچوونێكی مەیدانی (خەڵك) لە سلێمانی و هەولێر، دەركەوت، كە هێشتا نرخی بەنزین گرانە و هیچ لە نرخەكەی دانەبەزیوە و نرخی لیترێك بەنزینی سوپەر بە 900 دینار و موحەسەن بە 825 دینار و نۆرماڵ بە 775 دینارە.

لای خۆشیەوە، گوڵیزار ڕەشید، جێگری سەرۆكی لیژنەی سامانە سروشتییەكانی پەڕلەمانی كوردستان بۆ (خەڵك) ئاماژەی بەوەكرد، لەم هەفتەیەدا لیژنەكەمان كۆبۆتەوە و بڕیارمانداوە سەردانی وەزارەتی سامانە سروشتییەكان بكەین و لە چەند ڕۆژی داهاتوودا ئەو سەردانە دەكەین.

سەبارەت بە بەڵێنی هەزران كردنی نرخی بەنزین لەلایەن حكومەتەوە وتی، “بەڵێنێك دراوە بۆ هەرزان كردنی بەنزین، بۆیە ئومێدمان پێیەتی و چاوەڕێ‌ دەكەین”.